Vawiin chawhma dar 11 khan Additional Chief Secretary Pu Arvind Ray-a hovin Secretariat Conference Hall-ah Mizorama Cable TV analog signal hmanga pek chhuah digital signal hna kalpui meka hmasawn dan leh harsatna awmte sawi ho a ni a, chak zawka hma lak theih dan tur ngaihtuah a ni.
Hetah hian sawrkar laipuiin digital signal-a inleh kim hun tura a tuk (dateline) bawhpelh a nih dan leh a chhan hrang hrangte tarlan a ni a. Cable TV operator-te chuan an duh khawp Set Top Box an kawl thu an sawi rualin, analog signal tihtawp a la nih loh avangin mipui zingah set top box neih la tum tlat lo an awm chu an harsatna lian ber a nih thu an sawi a. Set top box kawl sa, tekin a den chhiat avanga siam that ngai pawh a awm nual tih an sawi. Tuna set top box vuah tawh chinah pawh analog TV hun laia mi ang tho khan fee khawn a la ni rih a, hei hi mipuite’n an hlawkpui zawk thu an sawi bawk.
District Nodal Officer-a ruat Additional DC-te chuan an district dinhmun tlangpui report an pe a. Phase-III huanga Mizoram khawpui 23-ah December ni 31, 2015 kha dateline a nih laiin, tun thlenga la che miah loh te pawh an awm a. Phase-IV huanga a bak zawng thingtlang khuate tan December ni 31, 2016 hi dateline ni thungin, hemi hunah erawh hi chuan Mizoram pumah digital TV hi kalpui hman vek tura hma lak ni se, tiin he hunah hian rel a ni.
Analog Cable TV signal te digital signal-a thlak chungchangah hian khawpui huam chhunga awmte mai bakah, Mizoram thingtlang khaw tin tuam chhuak vek turin chak taka hma lak tum a ni a. Tun dinhmunah Mizoramah digital signal pek chhuah phalna {Multi System Operator (MSO) provisional licence} nei operator sawm an awm mek a. Khaw tina Cable TV Operator-te’n MSO licence nei tawhte hnen atang hian an pawt chhawng ve leh thei dawn a; chutia an pawh chhawn chuan Local Cable Operator (LCO) tih an ni ang a. Anni hian Last Mile Operator (LMO) te hnenah an pe chhawng ve leh thei ang.
Cable TV operator, LCO emaw LMO emaw ni turte chuan an hnen atanga connection pawttute’n digital signal an dawn ve thuai theih nan leh kum 2016 ral hmaa Mizoram pumah digital signal hman a nih vek theih nan an duh ber MSO pan a, tih tur tulte bawhzui ve zung zung tura beisei an ni a. Analog signal tihtawp a nih huna kan buai rum rum loh nan mipuite paw’n STB vuah thuai a tul thu tarlan a ni bawk.
He Meeting-ah hian GAD leh I&PR Department officer-te leh District Nodal Officer eng emaw zat an tel a. MICODA, Mizoram Consumer Union, LPS, Zonet leh district hrang hranga Cable TV aiawhte an tel bawk a ni.
