Vawiin chawhma dar 11 khan Environment, Forest & Climate Change (EF&CC) buatsaihin International Biological Diversity Day 2016 lawmna chu Assembly Annexe Building Conference Hall-ah neih a ni a. EF&CC Minister leh Mizoram Biodiversity Board Chairman ni bawk, Pu Lalrinmawia Ralte chuan khuallian niin he hun hi a hmanpui a, EF&CC Department-a thawktute bakah Institute of Advanced Study in Education (AISE)-a zirtitu leh zirlaite an tel tha hle.

Khuallian EF&CC Minister Pu Lalrinmawia Ralte chuan lo hal hian biological diversity tichhe nasa viau thin mahse loneitute chhawk zangkhaitu a nih miau avangin awlsam taka bansan mai theih a ni lo tih sawiin mithiamte chu lo hal kher ngai lova lei hang tha tak leh enkawl hahdam tur sia lo leh huan neih dan mipuite zirtir uar turin a sawm a. NLUP hmalakna chu intodelh mai bakah biological diversity humhalhna tangkai tak a nih thu Mizoram Biodiversity Board Chairman chuan a sawi bawk. Minister chuan ram ro hlute ngaihhlut nachang hriat a tul thu sawiin, ramdang atanga thlai leh rannung chi dang lakluh hian nasa takin harsatna a thlen thei tih hriat a tul thu a sawi bawk. Mizoram chu India rama ramngaw nei tha berte zinga mi a nih avangin khualzin hip nan hman tangkai thiam a tul tawh takzet a ni tiin Khuallian chuan biological diversity humhalh zawnga khualzin hiplut tura hmalak a ngai a ni, a ti a. Kan rama thing leh maul eh nungchate kan humhalh that loh chuan thangtharte chenna tlaklohah kan ram hi kan chhuah ang tih a hlauhawm hle a ni, a ti bawk. Khuallian chuan Peoples’ Biodiversity Register (PBR) bu chu mipuite hmuh theih turin a tlangzarh bawk.

Principal Chief Conservator of Forests (PCCF) leh Principal Secretary Pu Lalram Thanga, IFS chuan kalkhawmte lawmna thu leh Biodiversity pawimawhna thu a sawi a. ‘Mipuite leh an eizawnna tluantling atan a laiah Biodiversity’ tih thupui hmanga kum 2016 International Biological Diversity day lawm a ni hian rah tha tak a chhuah ngei a beisei thu a sawi bawk. Dr. Lalthanzara, Asst. Professor, Pachhunga University College leh Dr. Carmelita Pachuau, Horticulture Extension Officer, Horticulture Department, Govt, of Mizoram ten hemi ni denchhena Technical Paper an buatsaih chu zirho a ni bawk.

Thilnung chi tinrengte humhalha venhim an nih theih nan United Nations Convention on Biological Diversity (CBD) chu kum 1992 khan Brazil khawpui Rio de Janeiro-a Earth Summit ah khan din a lo ni tawh a. Hemi denchhen hian May ni 22 hi 'International Day for Biological Diversity' atan UN chuan a lo puang ta a ni. Kumtin thupui thlanbik neih a ni thin a, kumin thupui atan 'Mainstreaming Biodiversity: Sustaining people and their livelihood' tih thlan a ni a. National Biodiversity Authority chuan State-tin te he ni hmang tura a lo ngen tawh a ni. Mizoram Biodiversity Board ah hian Environment, Forests & Climate Change Department Minister Chairman a ni a, Chief Wildlife Warden, Environment, Forests & Climate Change Department chu Member Secretary niin, expert member panga an awm bawk.

Mizoram Biodiversity Board kaihhruaina hnuai ah hian hmalakna kawng hrang hrang neih a ni a, chungte chu –

i) Mizoram chhung thingtlang khaw hrang hrang ah Biodiversity Management Committee (BMC) din a ni a, tunah hian Mizoram pumpuiah BMC 221 din a ni tawh a. Heng BMC hnuaiah hian People's Biodiversity Register (PBR) siam niin tunah hian PBR 4 - Pamchung PBR, Thenhlum PBR, Pangzawl PBR leh Laki PBR-te siam zawh tawh a ni a. Tin, MZU PBR hi buatsaih mek a ni bawk. Hetiang register hi la siam belh zel tura ruahman ani.

ii) PBR documentation atan hian district tinah Technical Support Group (TSG) din niin hetah hian EF&CC Department bakah Department danga mi te, NGO/prominent citizen emaw helam kawnga tuimite chu a tul ang zel a BMC te puibawm turin ruat an ni.