Chief Secretary Pu Vanhela Pachuau, IAS hovin nimin tlai khan Conference Hall, New Secretariat Complex ah  AYUSH leh Ramhmul damdawi tihhmasawnna kawnga hmalak dan tur sawihona neih a ni a,Pi S.Jalaja IAS, Union Health Ministry hnuaia AYUSH Department  leh Mizorama AYUSH in a kaihhnawih department hrang hrang aiawhte an tel a
Pi Jalaja chuan Mizorama an lo kal chhan chu AYUSH leh Ramhmul damdawi siamchhuah kawnga Mizoram tihthanharh leh tihhmasawn dan tur dap ani tih sawiin kan khawsak danphung inher danglam zelin natna benvawn chi hrang hrang a rawn thlente hi AYUSH hmanga enkawl theih anih thute leh Mizoramin chu chu a mamawh berte zing ami ni a a hriat thu a sawi. AYUSH chu NRHM peng pawimawh tak pakhat anih avangin ngaihthah mai chi a ni lo tih a sawi bawk. Hei bakah hian Sorkar Laipuiin AYUSH tih hmasawnna atana hmachhawp hrang hrang duan chhuahte tarlan a niin sawihona neih a ni a, Mizorama AYUSH Centre din anih ve theih dan turte sawiho a ni bawk.

Mizoram Sorkar  chuan AYUSH tihhmasawnna kawnga harsatna chi hrang hrang an tawhte an sawi a,  heng harsatnate hi lo ennawna a theih ang anga hma lakpui an inpeih thu Sorkar Laipui aiawhten an sawi a, Chief Secretary Pu Vanhela pawhin Mizoram Sorkarin a tih ve theih ang ang te lo bawhzui a inpeih thu a sawi a, State Medicinal Plant Board tichak thar leh tura hma lak a tul thute a sawi.

Tunah hian Mizoramah Primary Health Centre 153 awmin Homeopathic Doctor 10 an awm mek a ni.