1972/2023-2024

Aizawl, 21.09.2023: Vawiin khan Health & Family Welfare Minister Dr. R. Lalthangliana chuan 'Energy for Health' program Mizoram chu Zemabawk Urban Primary Health Centre ah hawnna hun a hmang. SELCO Foundation, Mizoram leh Health & Family Welfare Department chuan Memorandum of Understanding (MoU), thawhhona thuthlung an lo ziak tawh angin he program kaltlang hian ram chhunga Health Centre 300 chuang zet chu solar hmangin kawlphetha leh eng pekchhuah tum a ni.

Health Minister Dr. R. Lalthangliana chuan kumin 2023 ral hma ngeia Mizorama Health Centre 300 chuangah cheng nuai 3 atanga nuai 8 thleng zel senga ni zung chakna hmanga hnathawhna atana an mamawh power pechhuak tura hma an la tur chu lawmawm a ti a. He Energy for Health hmalakna hi PHC leh Sub centre hrang hrang, kawlphetha hmuh thatloh avanga buai chang tawk thin te tan thu lawmawm tak a nih thu leh, tunlai khawvelah lungalhthei, tuialhthei, etc. atanga kawlphetha siamchhuah kalsan telh telh a nizung, luiluang chakna etc. (renewable sources of energy) hmanga kawlphetha siamchhuah uar deuh deuh a pawimawhzia a sawi.

Health Minister chuan SELCO nena an thawhhona chuan Mizoram tan hriselna kawnga hmasawnna pawimawh tak a nih tur thu sawiin, anni bakah Power Grid Corporation of India Limited, Power Finance Corporation leh company dangte CSR kaltanga district thenkhata hospital sak leh thuamthat hna thawh a nih dan te, chung bakah sum hnar hrang hrang hmanga hriselna in hma a sawn theihna tura lian tham taka sawrkarin hma a lak dante a tarlang a. Mipui hriselna sawrkarin a ngaihpawimawh thu leh, ngawrh taka kawng hrang hranga hma lak zel a nih tur thu sawiin mipui tawiawmna pawh a sawm a ni.

NHM Mission Director Dr. Eric Zomawia pawhin he hunah hian thu sawiin, damdawi in leh sub-centre te hi tichangtlung a, inenkawlna tha zawk mipui pe tur chuan khawl hrang hrang a thuam a tul thin thu leh, chung chuan kawlphetha an mamawh reng avangin Energy for Health Initiative chu Mizoram mamawh tak a nih thu a sawi.

He programme-ah hian Pu VK Joby, CFO -SELCO Foundation chuan Health Dept leh SELCO Foundation te ram hmasawnna kawnga an thawkho thei tur hi chu lawmawm a tih thu sawiin, "Energy for Health" program chu hriselna kawnga Mizoram a hmasawnna thlentu a nih theihna tura a tha thei ang ber a duan leh buatsaih a nih thu a sawi a. SELCO State Lead Pu Lalnuntluanga Kawlni pawhin kalkhawmte lawmna thu a sawi a ni.

"Energy for Health” hian Mizorama PHC zawng zawng leh sub-centre thenkhat a tuam ang a. PHC pakhat atana sum hman tur hi cheng nuai 7 atanga nuai 8 niin, Sub center pakhat solarise na tur chu cheng nuai 3 atanga nuai 4 ni tura ruahman a ni.

He program hawnna hunah hian hriselna kawng a mi thiam leh pawimawh tak tak te, sorkar dept atanga mi pawimawh te bakah khawtlang huapa hriselna kawng a hma la thin mi eng emawzat te nen hmasawnna rahbi thar tur te thlirho a ni.