1973/2023-2024

Aizawl, the 21st September 2023: Vawiin khan Mizoram Primary Teachers Association (MPTA) ten zirlaite chhawmdawlna Zarkawt Community hall-a an sem a, School Education Minister Pu Lalchhandama Ralte-in khuallian niin a hmanpui.

School Education Minister chuan he hunah hian MPTA ten zirlai harsate chhawmdawlna an sem chu ropui a tih thu sawiin midangte tana malsawmna nih aia hlu hi mihring dam chhanah a awm lo tih sawiin uar leh zuala kalpui zel turin a fuih.

MPTA chu service association-a member ngah ber, thingtlang kilkhawr zawng zawng huap a ni naa, an hotuten an tamna chhuanga sorkar an dawr ngai lo chu fakawm a tih thu sawiin MPTA ten zirna tihhmasawnna atana sawrkar an thawhpuina, thlawpna leh fuihnaah lawmthu a hrilh bawk.

Zirlaite chu chhawmdawlna an dawn te hmang tangkaia anmahni fuih kaltu leh nawr kaltu atana hmang turin a fuih a, mi puitling, ramin tangkai taka a chhawr leh fa hrin manhla an ni thei tih hria a, taimakna leh tumruhna nen an zirna kawng zawh sauh sauh turin a fuih bawk.

Endowment Fund semna hun hi Pu R. Zonunmawia, Presiden MPTA Gen.Hqrs. in a kaihruai a, Pi Rochami Fin.Secretary MPTA Gen.Hqrs. leh Chairman Endowment Fund Sub-Committee chuan Report a pe a. Report-a tarlan danin Students Endowment Fund hi MPTA chuan zirlai naupang harsa chhawmdawlna dawng tur mi 36 a thlang chhuak a ni. He chhawmdawlna dawngtute hi pawi fai Rs. 5000/-, T-Shirt, Kekawr leh Lukhum pek an ni a, anmah hruaitu an chhungte nen haw lam leh kal lam TA/DA pek an ni bawk.

Students Endowment Fund hi MPTA chuan kum 2022 atang khan a sem tan a, naupangte leh an chhungte hi Science Centre, State Museum leh Millenium Centre-te fan pui an ni a. He chhawmdawlna hi Zirtirtute'n an thawhkhawm atanga sem a ni.