1974/2023-2024

Aizawl, the 21st September 2023: Vawiin khan Science Teachers Association Mizoram General Conference vawi 36-na chu Synod Conference centre, Aizawlah hman a ni.

School Education Department Director Pu Lalsangliana chuan Khuallian niin he conference hi a hman pui a. Hun kal tawhah Science zir ngam an tlem thin a, tunah erawhchuan Sorkar leh STAM hmalakna zarah Science zirlai an lo pung ta a, Mizo ngei Science zirtirtu an lo thahnem ta a, a lawmawm tak zet tih a sawi.

Director, School Education chuan Zirlaite cho phura fuih thiam Science zirtirtu Mizoram leh Khawvel in a mamawh tih sawiin Science thiamna atang lo chuan ramin hma a sawn thei lo. Chuvangin Science zirtirtu tha leh science thiam te an pawimawh a ti. Ram changkangah phei chuan Science leh a kaihhnawih department-ah sum an dah hnem a, hmasawnna a thlen tih sawiin India hi khawvel hriat hlawh anihna hi science vang a ni a, August 23,2023- a Chandrayaan-3 thlaah an tum tir hi Science thiam vang a ni a ti bawk. STAM chu kum 38 a upa pawl puitling a nih avangin Mizoram hmasawnna tur ngaihtuahna seng zel turin a chah bawk.

He Huna thusawitu dang STAM President Dr. R.Lalengmawia STAM-in a din tirh atanga a buaipui ber chu Mizoramin Science leh environment lama hma a sawnna tur hi a ni, a ti a. STAM hian a hun lai mil zelin hma lakna hrang hrang an neih thin thu sawiin, tuna an hma lakna lian zual chu Mizoram Science Journal tihchhuah te, Children's Science Congress buatsaih te, STAM Proficiency Award sem te, Wipro company nen tangkawpa Wipro Earthian Science Project buatsaih te anih thu leh an hmachhawp tharah STAM Educational Foundation din a nih thu te a tarlang. Dictionary leh Science Practical guide book an tihchhuah mek thu a tarlang bawk.

STAM Conference-ah hian nikum 2022 chhunga Mizoram Science Journal -a thuziak tha ber (Best Article) leh thuziak thawh hlawk ber ( Best Contribution) lawmman MSJ Award sem a ni a, Dr. Vanlalhruaia Pachuau ziak " Engtinnge ramsa an kah mut thin" tih chu Best Article atan thlan a ni a, Dr. Laldinpuia, MZU chu Best Contribution Award pek a ni bawk, Award hian citation, memento leh sumfai a keng tel a ni.

STAM Conference ah hian Science zirna atana thawk tha, Children's Science Congress District Coordinator leh STAM member ni bawk, State Teacher Award dawng, mi pahnih, Pu Lalropuia Chinzah, Govt. High School, New Siaha leh Pu F. Lalhmangaihthanga, Headmaster, Govt. Lunglei High school te hnenah Chawimawina an hlan bawk.

Dr. R. Lalengmawia, President kaihhruaiin rorel a ni a, an thurelte chu- (1) Zirlai harsate chhawmdawl nan STAM Educational Foundation siam ni rawh se, (2)Elementary School -ah Science leh Mathematics zirtir thei (qualified teacher) dah a nih theih nan hma lak ni rawh se. (3) Class IV leh class VIII te Promotion Exam-ah hian common questions hmanga exam buatsaih a nih theih nan hma lak ni rawh se. (4) Zoram Medical College ah PG Diploma zirna hawn a nih theih nan hma lak ni rawh se. (5) STAM bultumin Science Teachers Award siam ni rawh se tih te a ni.

STAM conference-ah hian zawhna siam dan changkang Conceptual Understanding leh Higher Order Thinking Skills (HOTS) tih thupui zir a ni a, Dr. Jonathan Lalrinmawia, Academic Officer, MBSE chuan kalkhawmte a zirtir a ni.

STAM-ah hian Primary school atanga University thlenga Science zirtirtu member 528 an awm mek a ni.