Parliamentary Secretary Pu Joseph Lalhimpuia chuan Mizorama a vawikhatna ni turin Lunglei District chhung department hrang hranga officer-ten zirlaite an kaihhruai dawn a, anmahni thiam zawng leh tui zawng mila eizawnna kawng an dap thiam theih nan an tanpui dawn niin a sawi.He thu hi  vawiina Lunglei Circuit House Conference Hall-a Lunglei District Education Committee (DEC) meeting an neih tuma a sawi a  ni. 

 Lunglei DC Pi Lalzarmawii, IAS kaihhruai DEC meeting-ah hian Education changtu Parliamentary Secretary Pu Joseph Lalhimpuia chuan Lunglei District chhunga zirna in hrang hrang dinhmun chawikang tura theihtawpa tan lak tul a tih thu sawiin Lunglei DIET a B.Ed zirna hawn tum a nih thu te, Lungleiah zirna kaihhnawih office-te hmun khata an awmkhawm theih nan education complex siam tum a nih thu leh education a thawktute awmna tur quarters sak tuma ruahhmanna siam a nih thu te a sawi a ni.

Department hrang hranga officer ten zirna school tlawha school naupang te nen inkawmhona neih nise tiin officer-ten naupangte dinhmun hrechiang a, an mamawh mila an kaihhruai thiam theih nan school chuam bik neih tha an tih thu meeting-ah hian sawilan a ni a. SSA Mission leh RMSA Mission hmalakna leh hmachhawpte thlirho niin 2017-2018 a heng mission pahnihten hmalak an tum dan ruahmanna an siamte an thlirho bawk a ni.