No.2399/2021-2022

Aizawl, the 30th September 2021: Myanmar ram buai avanga Mizorama rawn tlan chhia zinga naupang sikul kal rual ten zirna an chhunzawm theihna atan School Education Minister Pu Lalchhandama Ralte office chamber-ah 29 September, 2021 chawhnu dar 3:00 khan online meeting neih a ni. He meeting-ah hian district hrang hranga DEO ten an district huamchhunga raltlan zinga naupang sikul kal rual an neih dan te leh hemi atana an mamawh te an sawikhawm a. MBSE hnuaia Pawl X leh XII te pawh an exam ve theih dan tur sawiho tel a ni. Mizorama Myanmar raltlan zinga zirlai awm zat atang hian hma lak zel a nih theih nan data tul ang te lakhawmin ruahmanna siam a ni a, hei hi Central sorkar lamah tunkar hian thawn thlak leh tura hmalak a ni.

Myanmar raltlan naupangten zirna tha an chhunzawm zel theih nan 17th September, 2021 khan School Education Minister Pu Lalchhandama Ralte chuan New Delhi-ah Central sorkar hotute a lo zu dawr tawh a, chuta an inbiakna atang chuan raltlan zinga sikul kal rual naupangten zirna tha taka Mizorama an chhunzawm theih nan chak taka hmalak zui zel a ni ta a ni. Central sawrkar dawrnaah hian Pu Lalhmachhuana, State Project Director, Samagra Shiksha Mizoram-in a tawiawm a ni.

Nimina online meeting hi Pu Lalchhandama Ralte chuan kaihruaiin Myanmar raltlante hi kan unaute an nih bakah kan mihringpui te an nih ang pawha kan ngaihven a kan chhawmdawl hi kan tihtur a nih thu a sawi a. He meeting-ah hian Secretary, School Education Dept. leh officer dangte bakah Directorate of School Education, Directorate of SCERT, MBSE leh Samagra Shiksha Mizoram hotute an tel a, district tin atangin Education Officer te an tel bawk a ni.