Mizoram tlawha lo zin mek sorkar laipuia Addl. Secretary leh National Health Mission (NHM)-a Mission Director ni bawk Pu C.K. Mishra hovin vawiin khan Aijal Club-ah Mizoram chhunga NHM programme kalpui dan leh hmasawn zel dan tur inrawnkhawmna hun pawimawh neih a ni a. Mizoram sorkar Health & Family Department Principal Secretary Pu Arun Goyal bakah Health Director te, District hrang hrang Chief Medical Officer-te leh mi pawimawh dang te an tel.

Pu C.K. Mishra chuan National Health Mission kaltlang hian damdawiina inenkawlna tha dawng phak lo hmun kilkhawr zawka chengte’n inenkawlna tha an dawn theihna tur sorkar laipui ruahmanna a ni, a ti a. He Mission hi Mizoramah a thang chak hle tih a lang a, chutihrual chuan an thlen chinah mipuite hriselna in hma a sawn phah em tih chu an intehna tur a ni, a ti. Mizoram chhungah nausen pianghlim thi zat Infant Mortality Rate (IMR) chu ram pum huap IMR aiin a hniam zawk chu thil lawmawm a nih rualin ngaihtha taka awm mai mai theih erawh an ni lova, nu nau chunga thi leh nausen pianghlim thi an awm tawh lohna turin theihtawp chhuahin an tang zawk tur a ni, a ti a. Hospital leh medical care pek theihna hmun, Doctor-te kut ngeiah an tluk luh tawh phei chuan nu nauchunga thi leh nausen pianghlim thi an awm loh na’n fimkhur leh uluk lehzuala thawk turin a chah a ni.

NHM Director chuan District thenkhat hmasawn chak fal bik avanga rampum tehnaa sanga lan ringawt a tawk lova, mipui hriselna titha turin District tinte hian rual takin hma an sawn tlang tur a ni a, a hnufual bik District-te hi kan ngaih pawimawh a tul a ni, a ti a. Vantlang rinkai ni tur chuan sorkar enkawl damdawi in te fai leh thianghlim taka enkawl a tul a, thil liantham leh ropui tak tak kan buaipui mek lai hian a bulthut lam kan ngaihthah tur a ni lo, a ti. Pu C.K. Mishra chuan hri danna vaccination pek chu a pumhluma sorkar kuta awm, mimal damdawi in te tih ve theihloh thil a ni tiin India ramah naupang zawng zawngin a hun taka vaccine an lak vek theihna tur leh vaccine in a dan theih natna avanga thi an awm tawhlohna’n tan la turin kalkhawmte a sawm a. Mipui hriselna tura hna an thawhna kawngah a fuhlo lai leh diklo lai a awm a nih chuan siam tha a, an la tih ngailoh thil thar ngaihtuah chhuak tur leh chutiang ngaihtuahna thar nei an awm a nih chuan sorkarin a ngai pawimawh leh a thlawp tlat tur thu a sawi bawk a ni.

Principal Secretary Pu Arun Goyal chuan Mizoram-a Health dinhmun tlangpui kalkhawmte a hrilhfiah a. Heta a lan dan hian Infant Mortality Rate (IMR) chu kum 2008 khan Mizoramah nau pianghlim 1000 zelah 37 niin hemi kum hian ram pumah IMR chu 53 a ni a, 2013 ah chuan Mizoram IMR chu 35 niin hemi kuma ram pum IMR chu 40 a ni. HMIS 2013-2014 report tarlan danin Maternal Mortality Rate (MMR) chu Mizoramah 76 a ni a, India ramah chuan 178 (SRS 2012) a ni.April 2014 atanga January 2015 thleng khan Mizoramah naupang thi zat (infant death) chu 659 niin IMR 35 a ni a. April 2014 atanga January 2015 chhung khan Mizoram chhunga nausen thla 9 atanga 11 inkar vaccine la kim thei zat chu 15367 niin thla 12 atanga 23 inkar vaccine la kim thei zat chu 3356 niin za zelah 67.4 a ni. Mizorama mipui awm zat chhutin mihring 3100 zelah Doctor pakhat awm ang a ni a, India ram pum mihring awm zat chhut chuan mi 41760 zelah Doctor pakhat awm ang a ni (NHP 2012).

NHM Mission Director CK Mishra chuan vawiin vek hian Aibawk PHC leh Melriat Sub Centre a tlawh a ni.