Mizorama Open Defecation Free (ODF) District hmasa ber leh India ram Distrcit 700 zinga 82 na a  puan, Champhai District chuan an mellung phun chhuanawm tak chu ropui taka lawm a tum a. A lawmna tur Programme ngaituahin nimin tlai khan Champhai DC Conference Hall, Keifangtlangah ODF Champhai District Celebration Committee chu Bawrhsap Pu Vanlalngaihsaka hoin an thukhawm.

Meeting chuan lawmna hi February 17, 2017, Keifangtlangtlang Indoor Stadium ah neih ni se tiin a rel a. Hemi ni hian Champhai District in faina leh thianghlimna kawnga hma a sawn zel theihna tura intuai thar lehna hun hman ni se tiin a rel nghal a ni.  He hun hi hlawhtling taka hman anih theih nan chanvo hrang hrang nei turte hnenah mawhphurhna semfel nghal a ni.

ODF lawmna hun ah hian Khuallian a tan Chief Minister Pu Lal Thanhawla beisei a ni a. Rural Development Minister Pu R. Lalzirliana, School Education Minister Pu H.Rohluna, UD&PA Minister Pu Zodintluanga, NLUP Implementing Board Chairman Pu J.H.Rothuama, Lt.Col. ZS. Zuala, Parliament Secretary, Rural Development; Pu Hmingdailova Khiangte, Parliamentary Secretary ,UD&PA; Pu T.T. Zothansanga, Parliamentary Secretary, FCS&CA; Tuichang bialtu MLA Pu Lalrinliana Sailo, Pu T.Sangkunga, Chairman, MYC; Aizawl South-1 bialtu MLA Pu R. Vanlalvena, Hrangturzo bialtu MLA Pi Vanlalawmpuii Chawngthu, Mizoram Chief Secretary Pu Lalmalsawma leh Sorkar Department hrang hrang Secretary te,  District tin DC te leh Mizoram PHED hotute tel tura beisei an ni bawk.