2335/2025-2026

21st November, 2025 : Dt 10.11.2025 khan Queensland Australia khawpui Brisbane ah pawl hrang pathum,Humanitarian Assistant & Disaster Relief Institute(HADRI) ,Australian Chin Community Council(ACCC),Mizo Zirlai Pawl ten Mizorama Raltlan awm mek te chhawmdawl tura thawh hona tur thuthlung (Agreement) an signed a.He agreement siamna inkhawm ah hian Rajya Sabha MP Pu K.Vanlalvena chu Khuallian ni in Queensland Australia Senator Pu Paul Scarr chu Khual zahawm a ni.

He thawh hona tur thuthlung hi kum thum chhung atan a ni a.HADRI CEO Pu Mitchell King te,HADRI Managing Director leh Australia Chin Community aiawh ni bawk Pu Lawmthanga Brisbane leh MZP General Hqrs General Secretary Pu Lalhmingsanga ten hming an signed a ni.

Queensland Australia a awm Mizo hnam peng pakhat Matu Community ten Dt 15.11.2025 ah Matu Pawlkut an hmang bawk a.He Kût ah hian Rajya Sabha MP Pu K.Vanlalvena chu Chief Guest niin Australian Political Leader pali Pu Cameron Dick Dy Leader of Opposition Labour Party MP te,Logan city Mayor Pu John Raven te,Australian Indigenous Leader Pi Heather Castledine te,LNP party Senator Pu Paul Scarr te chu Khual zahawm an ni bawk .African Australian pawl te,Australia Indigenous pawl te leh Brisbane Councillor pathum ten he Pawl Kut hi an hman pui bawk a ni.

Matu Community Australia hruaitu te chuan Matu hnam peng hrang hrang 15 te chu Mizo Tribal list a an tel ve theihna tura hma lak sak turin Pu K.Vanlalvena hnenah hian tawngkam leh ziakin ngenna an lo thlen bawk a ni.

Dt 16.11.2025 zan ah Australian Chin Community Council kaihhruainain Chin hnam peng hrang hrangte conference Brisbane khawpui ah neih nghal a ni a.He conference ah hian Rajya Sabha MP Pu K.Vanlalvena chu Khuallian niin MZP General Secretary Tv.Lalhmingsanga chu Khual zahawm a ni bawk.

Pu K.Vanlalvena chuan fuihna thu sawiin Khawvel khawi ramah pawh awm i la khua leh tui tha kan nih a pawimawh a.Ram hrang hranga cheng Zofate hian inpumkhatna kan neih a tul a.Mahni hnam bil chauh dinchhuah tumna hi paih boin kan zavaia kan damkhawchhuahna tur hi lungrual taka kan zawn tlan a tul thute,mahni hnam tawng theuh te humhalh chung siin kan common language atan Mizo tawng kan thiam vek a tul thu a sawi bawk.Insuihkhawm a tul thu te sawi thin mah ila inpumkhatna a awm loh chuan insuihkhawm hian awmzia a nei lo va.Mahni unau indona hian rah tha a chhuah ngai loh thu a sawi bawk a.Zofate dinchhuahna tur chu Pathian thu kan awihna chauh hi a nih thu leh ralthuam hian eng hnam bil mah a dinchhuah tir dawn loh thu te sawiin Pathian min pek mahni ram tlanbo sana ram changkang zawka pem kan intih hmuh zel chu tha lo a tih thu a sawi bawk a.Kan ram chhunga harsatna tawk mek ten pem chhuah san zel an châk lohna turin ram danga awm tawh ten theih tawp chhuaha kan tanpui hi kan mawhphurhna a nih thu Pu Vena chuan a sawi bawk.

He Chin hnam pual conference hi Australian Chin Community Council(ACCC) hruaitu Nl Judith Hnemtein a kaihruai a ni.