Vawiin chawhnu khan Chief Secretary Conference Hall, New Secretariat Complex Aizawlah North Eastern Council Project Identification Committee leh Mizoram sawrkar department hrang hrang hotute an thukhawm a, Pu Arvind Ray, Chief Secretary in he hun hi kaihruaiin Pu Ram Muivah, IAS, Secretary, NEC, Pu Naveen Verma, IAS, Secretary, MoDoNOR leh Pu SN Pradhan, Jt. Secretary ten an telpui a, Pi Lalrodingi, Adviser (Banking Industries & Tourism Sector) leh Pu Joseph Lanah, Research Officer, Planning Sector, NEC ten an tawiawm bawk.

NECPIC memberte leh Mizoram sawrkar department aiawhte hian Mizorama kum 2017-18 chhunga Project thar kalpui mek 13 te chungchang sawi hona hun an hmang a, Project changtu department theuh atangin hmalak tawh na leh hmalak zel dan tur tarlan a ni bawk.

NEC-PIC hi DoNOR Secretary kaihruaina hnuaia din niin NEC Secretary, hmarchhak State Chief Secretary leh Ministry aiawhte member an ni a, NEC project hrang hrangte tih hlawhtlinna kawngah thuneihna sang tak an nei a ni. Mizoramah NEC-PIC thutkhawm hi a tum khatna niin tunhnai khan Assam ah neih alo ni tawh bawk a ni.