No.3280/2019-2020

Health & Family Welfare Minister Dr. R. Lalthangliana chuan vawiin khan Secretariat Conference Hall, MINECO ah thuthar thehdarhtute kawmin Mizoramah COVID-19 hri vei hmuhchhuah a nih thu a sawi.

COVID-19 vei hmuhchhuah hi patling kum 50 mi niin March ni 15 khan Amsterdam (Netherlands) atangin a rawn chhuak a, thlawhtheihnaa a rawn haw kawngah Doha (Qatar), New Delhi leh Guwahati rawn tlawhin March ni 16 ah Mizoram a thleng a ni. Amsterdam-a a awm lai atangin fimkhur thuhlaah Aizawla daktawr a hmelhriat rawn be pawpin Ministry of Health & Family Welfare, Government of India in quarantine guideline leh inven fimkhur dan tur a ruahmante an thawn nghal a. Chung chu fimkhur takin a rawn haw kawngah pawh a zawm char char a ni.March ni 15, 2020 ah New Delhi rawn thlengin zankhat a riak a, March ni 16, 2020 khan Indigo Airline ah chuangin New Delhi atangin Guwahati a rawn tum a, hemi ni vek hian GoAir ah chuangin Lengpui Airport, Aizawl a rawn thleng a ni. Ministry of Health & Family Welfare-in hetih hunlaia kaihhruaina a siamah COVID-19 symptom langchhuak chauh swab test sample lak tur tih a ni. March ni 18, 2020-ah a khua a sik tan a, a reh mai loh avangin March ni 20, 2020 khan Mizoram sawrkar Health & Family Welfare Department bia in a in report a, March ni 22, 2020 khan a chenna inah daktawrin a tlawh nghal a. Test tur throat sore swab sample la in GMCH laboratory, Guwahati-ah thawn nghal a ni. Amah tlawhtu daktawr pawhin an chhungkua an lo in quarantine tha hle tih a sawi nghe nghe. Swab sample test result hi nizan March ni 24, 2020 zan rei tawh lamah Mizoram sawrkarin a dawng a, fimkhur taka test hi neih niin vawikhat dang test nawn leh a nih hnu ah COVID-19 positive a ni tih hi confirm a ni. Confirm a nih veleh a chenpui a nupui leh a fate pahnih chu ZMC Isolation ward ah phurh phei nghal niin khunghran nghal an ni a, vawiin lamah chuan amah pawh a khawsikte a tlahniam tawh a, a nupui fanaute ah COVID-19 symptom a la lang rihlo a ni. A chenna ina amah tlawhtu daktawr pawh tunah hian a in self-quarantine nghal a ni. Tunah hian contact tracing (natna veitu in a lo zin haw kawnga mihring a bul hnaia awm zawng zawng chhui) nghal a ni a. March ni 16, 2020-a Delhi leh Guwahati inkar Indigo Airlines flight no. 6E 939 leh March ni 16, 2020 Guwahati leh Aizawl inkar GoAir flight no G8X/G8298 a chuangte list sawrkarin a nei vek tawh a, hei bakah hian heng thlawhtheihna a chuang te chu lo in self-quarantine nghal vek a, an chhungte pawh chutiang bawka hma la tur leh Health & Family Welfare Department hotute emaw COVID-19 Helpline- 102 (toll free), 0389-2323336/2318336 ah te in report tura ngen an ni a. COVID-19 positive case te hming leh nihna (identity) social media a thehdarh lo turin mipuite ngen kan ni bawk.

Health Minister Dr. R. Lalthangliana chuan COVID-19 vei hmuhchhuah tak hi mi puitling tak, ram pawna zirna sang zawk zir mek a ni a, amah pawh a fimkhur em em a ni, a ti a, mipuite thlabar leh chi-ai mai lo tura chahin hri vei chhungte leh an laichinte tana hriat nuamlo tawngkam dengkhawng tak tak hmang lova thlamuantu leh tawngtaisaktu ni zawk turin a sawm a. Media te pawh thuthang diklo thehdarh laka venpui ah a sawm a. Mipuite chu in lamah tawm tur leh social distancing (metre khat tala midang hlat a awm tur) zawm turin a chah a ni.