468/2026-2027

Aizawl the 11th May, 2026: Ram lei leh hralh bakah inremna hrang hrang siam nana hman thin Non Judicial stamp paper aiah e-stamping hman a nih theih nan vawiin chawhma dar 11 khan Land Revenue & Settlement (LR&S) Minister pisaah LR&S Department leh Stock Holding Corporation of India ten thawh hona thuthuthlung an ziak. He thawhhona thuthlungah hian Mizoram Sawrkar aiawhin LR&S Secretary Pu Vanlalmawia, IAS, leh SHCIL aiawhin Regional Manager (East & North East) Pu Pritesh Kumar ten hming an ziak a ni.

Thu sawiin Minister Pu.B.Lalchhanzova chuan ram emaw, in leh lo emaw, lei leh hralh bakah mimal leh pawl inkara inremna siam nemngheh nan Non judicial stamp hman thin niin, chu chu sawrkarah register thin a ni a. Inremna a zira stamp duty chawi a ngaih thin thu leh, chu Stamp duty chu lehkha (paper)-a lei thin a ni, a ti a. Stamp paper awm sa a zawh chang te, denomination mamawh ang a awm loh chang te a awm thin bakah stamp paper lem (fake) siam an lo awm thin tih sawiin Revenue Minister chuan heng harsatna te hi nuaibo a nih theih nan June ni 2, 2024-khan sawrkar chuan The Mizoram Stamp Rules siam tha (amend)-in electronic hmanga stamp duty pek phal a ni, tih a sawi a; chumi bawhzuina atan thawhhona thuthlung ziah a lo ni ta hi a lawmawm hle a ni, a ti.

Minister chuan Stamp duty chu State Sawrkar chan liau liau a nih angin a lakkhawm kawngah thahnem ngaih a tul thu sawiin kum 2024/25 a Stamp Duty tlingkhawm chu vbc 13.45 a ni a, kum 2025/26 ah chuan vbc 20.2 ah a pung a ni, a ti a. Kum 2026/27 chhungin Finance Department chuan stamp duty atangin cheng vbc 22.5 a bituk a, e-stamping hman a nih dawn tak piah lamah Sub Division level a Sub Registration Office hawn a nih tak avangin Finance Department bituk zat hi khum ngei an inbeisei thu a sawi a ni.

Pu B. Lalchhanzova chuan stamp duty lak chungchangah e-stamping hmang tura department-in hma an lakna kawngah harsatna hrang hrang an tawh thu sawiin tuna a hlawhtlinna an hmu chho chu LR&S Department-a a thawhpui te thawhrimna rah a nih thu a sawi a ni.

E-stamping hi a bul tan nan Aizawl District ah Pilot project atan kalpui a ni dawn a. A tahtawlin District dangah pawh kalpui vek a ni ang. Pilot project hi ni 45 chhunga tihfel tura duan a ni a. A hlawhtlin hunah chuan mahni awm hmunah emaw, Accredited collection centres atangin emaw, stamp duty chu pek theih a ni tawh dawn a. Hei bakah hian stamp indaihlo leh chatlak a awm tawh dawn lo a. Stamp duty hralhna leh leina bo thlau pawh a nuai bo dawn a ni tih Pu Pritesh Kumar, Regional Manager, SHCIL chuan a sawi.

E-stamping chungchanga thawhona thuthlung ziahnaah hian Pu R.Lalthazuala, MCS, Director LR&S chuan a hman dan tur te, mipui leh sawrkar tanna awlsam a thlen dan tur te a sawifiah a ni.