Vawiin khan Directorate of Health Services Conference Hall-ah World Hepatitis Day 2019 denchhenin Dr.F.Lallianhlira, Principal Director, H&FW Department chuan Hepatitis natna enkawltu Programme, National Viral Hepatitis Control Programme a launch a. Hemi rual hian ni 2 awh tur Training buatsaih nghal a ni bawk.

He NVHCP launching Programme hi Dr. Eric. Zomawia, Mission Director, NHM in kaihruaiin kalkhawmte lawmna thu a sawi a. Dr.F.Lallianhlira, Principal Director chuan hriselna kawnga Mizoram dinhmunte tarlangin hmasawnna rahbi thar Mizoramin a rap thei chu lawmawm a tih thu a sawi a.

Thusawitu dang Dr. Lalthanpara, OSD, Mizoram State Health Care Society pawhin Hepatitis chu Health Care lamah pawh huam tir a nih thu leh huam zau zawka kal theih nana theihtawp chhuah a nih thu a sawi a. Tin, Programme Officer Dr. Robert L. Khawlhring leh Dr. Lalrothuama, Nodal Officer, CHA pawhin thusawina hun an hmang bawk.

Tunah hian Hepatitis enkawlna hmun Model Treatment Centre hi Civil Hospital, aizawl-ah din a ni tawh a. State Nodal Officer-ah Dr. F.Lalrothuama niin State Laboratory hi Dr. Lalhmingmawii kaihhruaina hnuaiah Department of Microbiology-ah bun fel a ni tawh bawk. Tin, District Treatment Centre hi District Hospital tinah dah a ni tawh bawk.

Tuna Hepatitis Programme thar hian kum 2030-ah chuan Hepatitis natna hrang hrangte umbo a nih theih nan theihtawpin hma a la chho tan dawn a. Hepatitis natna hrang hrang avanga thihna te tih tlema pumpelh chhoh a nih theih nan tunah hian hma thar la a la chho tan mek a ni. Kuminah hian Hepatitis venna hi sawrkar laipui duhdan angin High Risk Group, damlo enkawltu hrang hrang, damlote nena inngheng hnai kan tih, Health Care Workers ten an dawng hmasa dawn a. Nakkum atangin mipui nawlpuite pawhin awlsam zawkin a thlawnin an dawng chhunzawm chho zel dawn a ni.

Hemi chungchanga hriat duh nei tan Dr. Robert L Khawlhring, State Programme officer leh Lalchhuansangi Khiangte, State Coordinator te hnenah englai pawhin zawh fiah theih reng a ni ang.