Chhiat rupna (disaster) a lo thlen thulha felfai leh rang zawka enfiah hna leh chhawmdawl hna kalpui a nih theih nana Lawngtlai khawpui chhung veng hrang hrang bialtu tura ruat Zonal Officer-te chu vawiin khan Lawngtlai Addl DC Pu B. Lalchhawntluanga, MCS chuan a pisa-ah ko khawmin, an tih tur leh mawhphurhnate a hrilhfiah.

He hunah hian zonal officer-a ruatte an kal tha hle a. Zonal officer mawhphurhna inhrilhfiah a nih bakah, chhiat rupna thlen thulha hma lak dan tur leh tih dan tha nia hriatte sawi ho niin, rawtna hrang hrang siam a ni bawk.

District Administration lam ruahmannain Lawngtlai khawpui chunga veng 12 chu zone (bial) 6-ah siam niin, zone khat huam chhunga chhiat rupna thlengte a rang thei ang bera enfiah a, chet lak dan tur leh chhawmdawlna ngaihtuaha hma la turin zonal officer pahnih zel ruat an ni a. Zone 6 awma mawhphurtu bik zonal officer 12 bakah hian, zonal officer-te awm remchan loh changa an ai awh theitu tur reserved zonal officer 4 ruat tel an ni bawk.

Lei min, tui lian, thlipui tleh, rial tla leh khuarel chhiatna hrang hrang bakah, kangmei avanga in leh lo, bungrua, huan thlai chhia leh nunna hial chante an awmin, bialtu zonal officer-te hnenah hian rang taka thlen tur a ni ang a. Anni'n a hmunah kalin an enfiah nghal ang a, chhiatna thleng azira chet lak dan tur leh chhawmdawl hna kalpui dan turte ruahmanin, report pekna tur form awm sa hmangin District Administration-ah an thlen chhawng ve leh ang a. Zonal officer-te enfiahna leh rawtna behchhanin hma lak zui a ni thin dawn a ni.

Chhiat rupna thlen thulha hma latu tur zonal officer ruat hi chhiatna thlengte felfai leh rang zawka enfiah leh chin fel zung zung a nih theih nana ruahman a ni a. Heti ang harsatna a thlen changa thawktu lam indaih lo lutuk thin chhawk zangkhaina a nih beisei a ni bawk. Zone then hran dan leh bialtu zonal officer-te hming leh anmahni biak pawh theihna te hi mipui hriat theih tura puanzar vek a ni a. Khawtlang hruaitute leh mipuite pawh chuti ang chhiatna thlengte chu anmahni bialtu zonal officer hrilh hmasa thin turin ngen an ni.