No.206/2020-2021
Pu H.L Rochungnunga. IAS Commissioner & Secretary, FCS&CA hovin nimin khan Task Force on Commodities member-te chu a pisaah an thukhawm a. State chhunga oil chatlak loa kan dawn theihna tura hmalak dan tur leh oil phurtu driver-te Covid-19 lakah him zawka an awm theihna turin ruahmanna an siam a. Heng an rawtna leh ruahmannate hi State Level Task Force ah thlen leh a ni ang.
Mizoramin thlakhat chhunga Oil kan mamawh zat te uluk taka chhutchhuah ni se, hei hi FCS&CA department ah thlenin ruahmanna hi a tul angin FCS&CA department-in oil phur tur te, motor intlanchhawk dan turah te ruahmanna an siam ang, tiin meeting chuan a rel a. Oil tanker driver te chu oil lak tur an nghah chhungin mahni in lama chhungte tlawh pawh tawh rih lo tura ruahmanna siam tha an ti a. Hemi atan hian Vairengteah an riahna tur hmun ngaihtuah sak an ni ang.An nitin mamawh ei leh bar tur tul zual pawh sorkarin ruahmanna a siam pui ang a. Pump neituten oil phur tur driver-te hi an vaia kal tir tawh loin thlan chhuah bik motor tlan tir tawh tur a ni a. All Mizoram Petroleum Dealers’ Association (AMPEDA)-in driver tlan bik tur mamawhna anga an thlan chu sorkar hotute nen inberawnin ruahmanna an siam ang. Driver te riahna turin Rest House, Vairengte-ah buatsaih a ni ang a, a hmunhma lo endika ruahmanna lo siam turin DC Kolasib leh DCSO Kolasib-te chu ruat tha an ti a ni.
Supply check gate, Vairengtea duty ten a tul angin truck driver-te hnenah kut silfai pawimawhzia te, mask vuah a pawimawh zia leh hri laka invenhimna atan driver te hriat tur pawimawh te a tam thei ang berin an hrilh ang a. Ei rawngbawl leh kawng laka riahna tur chungchangah Mizoram Oil Tanker Drivers Association (MOTDA) te chuan driver-te tan anmahni motor-a riah mai a awlsam zawk a, ei rawngbawlna hmanrua (Stove) pawh an intodelh mai theih thu meeting-ah hian an sawi.
Commissioner & Secretary Transport Department leh Chairman, Task Force on Transport ni bawk chuan Mizoram oil driver ten kalkawnga an riahna leh ei leh in an hmuh theihna tur hmun remchang ruahmanna siam sak a that thu meeting-ah hian a sawi a, chutihlaiin driver-te hian mahni motor-a riah leh eirawng in bawl chawp mai awlsam an tih zawk avangin an duh dan ang hian kalpui rih mai ni se tiin meeting-ah hian thu an dah.
Thenawm State, Assam, Tripura-te dinhmun thlirin fimkhur a tul tak meuh a. Nasa zawka essential commodities kan intodelh theihna turin hma lak a tul hle tiin Essential Commodities distributor hrang hrang ten kudam-a an dahkhawl sa te daihzai takin mipuite hnenah an sem chhuah a tul a. A theih ang angin State pawn lam a mi pawh lakluh chhunzawm tura hmalak ni se, sorkarin lockdown a pawtsei a nih pawhin mipuite kan buai lohna turin distributor ten kar hnih emaw kar thum emaw tal tla tur bungrua lo la khawm tura hriattir nise tiin meeting hian an rel.
