N0.207/2020-2021

Vawiin chawhnu khan Chief Minister Pu Zoramthanga ruahmannain Chief Secretary Pu Lalnunmawia Chuaungo chuan Aizawl City Local Council Association, All Mizoram Village Council Association leh Mizoram NGO Co-ordination Committee a Constituent Member hruaitute Secretariat Conference Hall-ah meeting a neihpui.

Meeting ah hian tuna Mizoram hmun hrang hrang leh Aizawl veng hrang hranga Lockdown puan avanga tangkhang te, an mahni khua theuha an haw theihna tur atan naktuk (09.04.2020) atangin hun hawn rem tih a ni a. Nimahsela, tuna an awm mekna Local Level Task Force emaw Village Level Task Force leh an haw na tur Local Level Task Force emaw Village Level Task Force te remtihna lak hmasak ni se tih a ni. 

Aizawl leh Mizoram khaw chhung hrang hranga Lockdown avanga tangkhang te hi COVID-19 hri lan chhuah theihna hun chhung (Incubation Period) a zawh tawh avangin COVID-19 hripui lakah hian an him ni a ngaih a ni a. An haw na tur khuaah te dahhran (Quarantine) a tul lo a ngaih a ni. Hetianga mahni khaw lama haw tur te hian an haw na tur ruahmanna an in siam thei ang a. He phalna hian mi thenkhat tulna awm lem lo a zin satliah leh zin fang tur te a huam lo a ni.