No.208/2020-2021

Vawiin chawhma khan Multipurpose Hall, Vairengteah bialtu MLA Pu Lalrinsanga Ralte; Pu Lalbiakthanga, IPS, DIG (NR); Dr H Lalthlangliana, DC, Kolasib leh Kolasib district-a sawrkar department hotu hrang hrang te leh Vairengte Joint VC, All Village Task Force Committee leh All NGO Vairengte hruaitute chuan Covid-19 hri darh tur venna kawnga harsatna an hmachhawn te chinfel dan tur an rel. Uluk taka thil awm dan te an sawi ho hnuin kawng dan tumna awm mek pawh thulh a ni.

Pu Lalrinsanga Ralte, bialtu MLA chuan Vairengte chu Mizoram tana khaw pawimawh tak, kan ram luhka leh chhuahka, mipui nitin mamawh phurh luhna kawng pawimawh tak a ni, a ti a. Covid-19 hripui leng laka Mizoram mipuite himna tura endikna hmun pawimawh tak a nih thu leh, hemi kawnga Task Force te hmalakna ropui a tih thu sawiin Vairengte Village Level Task Force hrang hrang ten sawt zawka hna an thawh theihna tura mamawh an thlen te chu Sawrkarin a ngaih pawimawh  thu a sawi.

He hrileng darh tur venga hma latute mamawh ruahman tur hian Chief Minister’s Relief Fund atangin Vairengte VC tin te tan cheng nuai 1 theuh ruahman a nih thu bialtu MLA hian a sawi a, hemi bakah hian DC Kolasib atangin ramri hrul Task Force te puih nan cheng singkhat theuh Vairengte tan ruahman a nih thu a sawi a ni. Vairengte khawtlang hruaituten mamawh an thlen angin bialtu MLA chuan Task Force duty-te invenna tur PPE, Mask, Gloves leh check gate pawimawh zuala hman tur Sanitizer leh sprayer te a hlan nghal a ni.

Kolasib DC  Dr. H Lalthlangliana pawhin ramri kana ruih tur zawng man khawmte chu Kolasib-a Quarantine Facility-ah enthlak tura dahkhawm an nih tur thu a sawi a. Ramri bula hmun pawimawh zualte chu tha taka tihfai (sanitize) turin hmalak a ni, a ti.

DIG (Nothern Range) Pu Lalbiakthanga Khiangte chuan Vairengte khawtlang hruaituten sawrkara mamawh an thlen zingah ramri hrul hmun pawimawha police duty dah tur chungchang a sawi fiah a.  Vairengte SDPO  leh khawtlang hruaitute inrawn khawmin hmun pawimawh zual an thlang chhuak ang a, heng hmun pawimawh bikah te hian police duty tur dah an ni ang, a ti.

Kolasib CMO Dr. Lalhlimpuia chuan Vairengte Screening gate-ah Doctor, Nurse leh medical lam mithiamte chauhin endikna (screening) an kalpui thin thu leh vawiin thlenga rinhlelhawm an la awm loh thu a sawi a. CMO chuan Vairengte Screening point pawimawhnate hriain Kolasib atangin Medical Doctor pakhat dah thlak belh nghal a nih thu a sawi.

Kolasib DAO Pu J Rothanga chuan Kolasib District chhungah ei leh bara harsatna lian zawk an tawh loh na turin loneitute tana ruahmanna awmsa tha tak a kalpui a tul thu a sawi a. Loneitute tan buh chi, thlasik thlai chi leh FOCUS hnuaia hmalakna kal mek - Vairengte-a chhungkaw 350 tan kuhva tiak, chhungkaw 26 tan aieng leh chhungkaw 25 tan behliang chi sem a nih tur thu a sawi a ni.

Vawiin meeting-ah hian Joint Village Council, All Task Force Committee leh All NGO Vairengte ten Covid-19 hri ven hna an thawhnaah Sawrkara an thil phut hrang hrang zinga engemaw zat tihpuitlin nghal a nih tak avang leh, a dangte pawh tipuitling thuai tura hmalak a nih dawn avangin  April ni 8, 2020 tlai dar 5 atanga kawng dan an tum chu an tulh ta a ni.