Mizoram chuan nikhat awh Information Technology lama Hmarchhaka intawhkhawmna lian ber ‘e-North East Summit 2014’ chu vawiin khan Aijal Club-ah a thleng a. Hetiang intawhkhawmna hi kumin hi a tum 5-na niin kumin hian Mizoram Sawrkar hnuaia Information Communication Technology (ICT) Department leh North East Development Foundation (NEDF) tangkawpten ‘5th e-North East Summit’ hi an buatsaih a ni. He Summit hawnna inkhawm Aijal Club-a neih ah Pu C. Lalhmachhuana, ITS, Secretary ICT Department chuan inlawmna thuchah sawiin a hawng a, Summit chungchanga thuhmahruai chu Dr. Syed S. Kazi, Lead Partner, NEDF chuan a sawi a ni.

He Summit hi Workshop pathum a then niin chawhma lam khan a rualin Aijal Club ah Worshop te hi neih a ni a. Heng Workshop pathum ah te hian Hmarchhak state hrang hranga Sawrkar Department, pawl leh sumdawnna atangte a IT lama project hlawhtling 51 te chu tarlana sawiho a ni a. Heng project te hian IT hmangin mipui tan awlsamna tam tak an siamsak baka IT hmangin mipuiin Sawrkar awlsam zawkin an dawr thei a. Zirna, hriselna, eizawnna leh kawng danga IT hman tangkaina te a tel bawk a ni.

He Summit kaltlang hian nasa takin Hmarchhak chu IT leh a kaihhnawih lamah a than beisei a ni. Worshop I ‘Digital Innovations For Citizen Services Delivery in North East India’ tih hi Pu C. Lalhmachhuana, Secretary, ICT Department chuan kaihruaiin, Pu Amitabh Singhal, Board Director, PIR chuan a moderate-a, Juror Invitee te chu Pu Sanjeev Sharma, Jt. Secretary, NETIA leh Prof. Basav Roychoudhury, IIM Shillong te an ni a. He Worshop ah hian IT mipuiin Sawrkara an dil leh dawr tih awlsamna leh Sawrkar inrelbawlna tih changtlunna thil 21 te chu tarlana, sawiho a ni.

Workshop II ‘Digital Innovation in Education, Learning & Healthcare’ tih hi Pu R. Lalvena, Secretary, School Education Department chuan kaihruaiin Shri Rajen Varada, CEO, Open Knowledge Community (OKC) chuan a moderate-a, Juror Invitee te chu Pu Debabrata Bhadury, Chief Coordinator, East & North East, NIELIT leh Pu Biswajit Hazarika, Chairman, IT, FINER te an ni. He Workshop-ah hian IT hmanga zirna leh hriselna tihchangtlunna leh hmang tangkai thil 11 te chu tarlana, sawiho a ni.

Workshop III ‘Digital Innovations in Livelihood & Enterprise, Commerce & Business, Culture & Heritage, Environment & Tourism, Inclusion, News and Media’ tih hi Pu Madan Mohan Rao, Board Advisor, DEF chuan kaihruaiin, Expert Invitee chu Pi Smita Sahay, Partner, NEDF niin Juror Invitee chu Pi Gayatri Buragohian, Director, FST a ni. Worshop ah hian subject tarlan taka IT hmanna tangkaina thil 17 te tarlana sawiho a ni.

Heng IT hman tangkaina thil hrang hrang 51 te hi endik an ni a, Category hrang hranga ti tha te hnenah he Summit zulzuia, vawiina chawhnua Legislative Assembly, Conference Hall-a ‘ 5th e-North East Award 2014’ buatsaiha ICT Minister Pu Lal Thanzara’n a hlan a ni.

Hetiang Summit hi Assam, Nagaland, Sikkim leh Arunachal Pradesh ten an lo thleng tawh a ni.