Vawiin khan Information Communication Technology (ICT) Minister Pu Lal Thanzara chuan 5th e-North East Summit 2014 zulzuia Mizoram Legislative Assembly Conference Hall-a 5th e-North East Award 2014 programme buatsaih chu khuallian niin a hmanpui a. He Summit-a IT hman tangkaina, Category hrang hranga ti tha te hnenah lawmman a hlan nghal a ni.
ICT Minister Pu Lal Thanzara chuan 5th e-North East Summit 2014 Aizawla buatsaih chu Mizorama IT leh IT kaihhnawih chungchanga thil lian ber thleng a nih thusawiin a buatsaihtute chu lawmthu a hrilh a. He Summit hian IT leh IT kaihhnawih lamah tunlaia thil thleng thar leh siamchhuah inhriat tawna, a hmang tangkaina lamah rah thar a chhuah ngei a beisei thu a sawi bawk.
Mizoram Sawrkar chuan IT hi a ngaihpawimawh thusawiin thil hrang hranga IT hman tangkai chhoh zelah mipuite tan awlsamna leh zangkhaina siam Sawrkar chuan a tum a ni a ti a. National e-Governance project hnuaia Mission Mode Project hrang hrang - State Wide Area Network (SWAN); State Data Centre (SDC) ; Common Service Centre (CSC) te; Aizawl-a e-District pilot project te; VAT collection system te leh VAHAN leh Sarathi te hi hlawhtling takin Sawrkar in a kalpui mek a ni a tiin State Delivery Gateway (SSDG) leh State Portal (SP) te chu kumin chhung a peihfel tum a nih thu a sawi.
Mizoram Sawrkar chuan Sawrkar Laipui flagship programme thar ‘Digital India’ chu tha a tih thu sawiin Digital India tih hlawhtlin nan Sawrkar chuan theihtawp a chhuah dawn a ni, a ti a. Inthlunzawmna ‘digital connectivity’, chu IT leh IT kaihhnawih thil atan a pawimawh leh a tul zia hriain, Sawrkar chuan State Level Committee on Telecommunications a din a, he Committee hian IT lamah Mizorama Sawrkar Laipui project : Intra-SDHQ-DGQ OFC project , National Optic Fibre Network (NOFN) leh connectivity lam project dangte hnathawh thlirlet, vilzui leh enpui hna te a thawk dawn a ni a ti.
Pu Lal Thanzara chuan tunhnai mai khan Mizoram Sawrkar leh Ministry of DoNER tangkawp chuan National Association of Software and Service Companies (NASSCOM) thawhpuiin, Business Process Outsourcing (BPO) leh Business Process Management (BPM) te Mizorama din dan kawng a dap mek a ni a ti. Hei hi a hlawhtlin a, company te kan sawmlut thei a nih chuan thalai tam tak tan eizawnna kawnga tha a in hawn ngei a beisei thu a sawi bawk.
Mizoram atangin he Award atan hian Nomination 8 a lut a; Mobiles for Services Delivery category a Regional Transport Office, Mizoram leh NIC Mizoram State Unit te project ‘Real Time Courtesy & Information SMS Without Using SMS Gateway chuan Award a dawng a. Taxation Department hnuaia Computerization of Taxes project; East Lungdar RD Block website; leh Mizoweb Livelihood Centre te chuan Special Mention an dawng.
Emerging IT State of the Year Award chu Mizoram in a dawng a, Facebook group Special Report chu Special Recognition of the Year Award pek a ni.
Award atan hian nomination 97 a lut a chutah tang chuan finalists 33 thlan an ni a; Award te Category hrang hranga 8-a project tha berte theuh pek an ni.
