Mizoram State Sport Council leh Mamit Tennis Association hmalakna hnuaiah mipa leh hmeichhia kum 6-18 inkar te tana ni 28th October - 7th November 2014 chhunga Mamit Tennis Court-a Catch Them Young Policy kalpui chu nimin tlai khan Pu Mickey R. Lalenkawla, Secretary, Mamit District Sport Committee in kharna hun a nei.
Kharna hunah hian Pu Mickey R. Lalenkawla chuan naupangte tana Tennis zirna hun tha tak mai buatsaih a nih theihnana hmalatu Mizoram Sport Council te chungah lawmthu a sawi a, hlawhtlinna nei ngei tura taima leh tihtak zeta bei chho zelturin naupangte chu a fuih a ni.
He Catch Them Young Policy hnuaiah hian naupang kum 6-18 inkar ten ni 28th October 2014 atang khan Coach Ramengmawia Mizoram No 1-in Tennis khelh dan a tobul atangin uluk takin naupangte a zirtir a ni.Mamit Tennis Association chuan Mizoram Sawrkar hmalakna hnuaia Catch Them Young Training Coaching Programme Mamit- Tennis Court a buatsaih a ni chu an lawm hle a ni.
Ni 25-28 November, 2014 chhung hian Mamit Tennis Court-ah Mizoram pum huap Mamit Open Tennis Championship neih a ni dawn a, Mamit Tennis Association chuan Mizoram Tennis Association hnuaia District tina Club leh Association zawng zawngte lo tel vek turin an sawmin an hriattir a ni.
