Nimin tlai khan Home Minister Pu R.Lalzirliana chuan Mizo Zaimi Insuihkhawm Pawl khawmpui vawi 34-na, Nisapui khua a nghah tak kharna inkhawm a hmanpui a. He inkhawmpui hi November ni 6 khan tan tawh niin an pawl President Pu Lalrinmawia Ralte, Forest Minister chuan inkhawmpui kharna hi a kaihruai a, Mizoram Journalist Association hruaituten MZI hruaitu thlanna an kaihruai a ni.

MZI khawmpui a thusawitu Home Minister Pu R.Lalzirliana chuan Mizo thinlung chhungril ber leh pawnlang ber thleng pawha khatliam chu hla leh zai a ni a. Zai leh hlathu te hi zo hnam peng hrang hrang te inpumkhatna leh in unauna atana hmanraw pawimawh ber zinga mi a nih thu a sawi a. Kan nunkhaw har ber lai hunte leh kan lungchhiat hun te hla thu leh zai hmanga sawi chhuak thin hnam kan nih avangin zai hmang hian hnam inpumkhatna atan pawh thil nasa tak tih theih a ni a. Zaia rawngbawlna hmanga In unauna lam hawia hma nasa zawka la turin zaithiam fuankhawm te chu a sawm a ni. Hnam dang ten Mizo an hriatna tlanglawn tak chu zai leh zaithiamte vang a ni a.Mizo zaithiamte tih hmasawn an nih theih nan Sawrkar pawh in hmalak tha a tih thu sawiin sawrkar chuan kumthar ah Mizoram music industry tih hmasawn nan cheng nuai sawm dah in bul a tan dawn a ni a ti.

Thusawitu dang MZI President ni mek leh thlan nawn leh Pu Lalrinmawia Ralte chuan zaithiam te chu mipui leh vantlang rawngbawltu, mi zawng zawng mit fukna an nih thu a sawi a. Mipui ten vantlang rawngbawltu zingah Zaithiam te nungchang an zir duh bik avangin Pathian hla satute chauh nilovin hla dang satute pawh an nun entawn tlakin kawng tin rengah an uluk a ngai a ni a ti.

MZI Conference neihna hmun Nisapui hi MZI sub-headquarters a ni a, nakum hian MZI khawmpui hi Kawrtethawveng ah nghah a ni ang. Tun tum MZI inkhawmpui ah hian zaithiam 200 chuang fuan khawmin an pawl president ah Minister Pu Lalrinmawia Ralte, Working President- Er.K.Lalrimawia, Vice.Pre. Lalengmawia, General Secretary - Lalhungchhungi Pachuau, Asst.General Secretary - David.Z Hmar, Treasurer - Helen Zaithankungi Sailo leh Fin.Secy- Lalrinliana Sailo. te thlan an ni.