Parliamentary Secretary Pu Joseph Lalhimpuia chuan vawiina Science Teachers’ Association Mizoram (STAM) General Conference vawi 30-na Synod Conference Centre-a neih a hmanpuinaah thu sawiin Mizoramin ngaihtuahna thar seng peih mi a mamawh a ni, a ti. Tihdan hlui paiha, tih dan thar tha zawk ngaihtuah chhuah a tul a, ram veina kawngah pawh hmanlai tihdan kalsana ngaihtuahna thar, a taka tih theih tur kawng dap thiam a pawimawh tiin mipui hnenah development leh innovative ideas neih a tulzia zirtir zel turin STAM member-te a sawm a ni.
Parliamentary Secretary chuan ram hmasawnna tehfung pawimawh tak chu Science leh Technology hmasawnna a ni tiin hemi kawnga chak taka hmasawn mekIndiarama chengkannih angin Mizoram pawhin hma a sawn mek zel a ni, a ti a. Hmasawnna in a ken tel pawimawh tak internet hmanga inbiakpawhna hian Mizote zingah kua a hreuh thuk tawh hle a, hei hi a tha zawngakanhman thiam theih nan Science zirtirtute in pawimawh a ni, a ti.
Middle School leh High School a Science leh Mathematics Teacher bik lakna tur sawrkarin Recruitment Rules thar a siam chungchang sawiin Parliamentary Secretary chuan School hrang hrangin an mamawh em em Science leh Maths zirtirtu lakna tur bik a lo awm ngai loh avangin indaihlohna a nasa a. Hei hi hriain sawrkar chuan zirtirtu lak dan thar siam a nih theih nan theih tawp a chhuah a, Middle School zirtirtu lak leh turah hian Science leh Maths teacher-te tan R.R thar siam a ni tawh a, High School ah pawh 30% chu Science leh Maths teacher lak a nih zel theih nan R.R thar gazette ah tihchhuah a ni tawh, a ti. Pu Joseph Lalhimpuia chuan Mizoram hmun hrang hranga school a fannaah laboratory equipments hman mang loh a hmu fo chu pawi tiin sawrkarin hmanrua duhthusam pe theilo mah se an dawn chhun chu tangkai taka hmangturina fuih a ni.
STAM Conference ah hian Pu Laldinpuia, Pachhunga University College buatsaih Mizoram leilung hausakna laihchhuah leh hemi in a nghawng tur ‘Geological related issues in Mizoram (Oil exploration & Natural Disaster)’ zirho a ni a, hei bakah hian Pu Lalrinthara Pachuau, Pachhunga University College buatsaih Science hmanga thil te tak te atanga lian tak a lo indin chhuah dan ‘The very Small to the very Big’ zirchianna paper ngaihthlak a ni.
Kum khat chhunga Mizoram Science Journal a Article tha ber Best Contribution Award chu ‘Leia tla chi sava lian (Pleasants Galliformes) Mizorama awm te’ tih ziaktu Dr H.Lalthanzara leh Lalawmawia Sailo te hnenah hlan a ni a. Article thawhhlawk ber Best Contribution Award chu Pu Zothantluanga (Bena Pa) in a dawng a, Best Agent Award chu Pu R.Lalremruata, St.Pauls Hr.Sec.School Teacher hnenah hlan a ni.
STAM hi August ni 9, 1986 khan din a ni a. He pawlah hian Primary School atanga University thlenga Science zirtirtu leh helama tui mi Mizoram hmun hrang hrang atangin member 457 an awm mek a ni.
