Tukin zing dar 7 khan Champhai District Bawrhsap Pu Vanlalngaihsaka chuan Champhai D.C. Office-a Mizoram Cooperative Apex Bank Ltd. enkawl, Extension Counter- cum-ATM Booth thar a hawng a. He hunah hian Mizoram Cooperative Apex Bank Ltd. Chairman Pi T. Lalmuanpuii leh Apex Bank hotu thahnem tak an tel a ni.

Mizotawng hmang ATM Booth thar hawn paha thu sawiin Champhai District Bawrhsap Pu Vanlalngaihsaka, IAS chuan Apex Bank-in Mizotawng ngeia inziak ATM a chhawp chhuak ta chu lawmawm a tih thu a sawi a. D.C. chuan Apex Bank chu Mizo-te Bank, a hlawkna pawh Mizoram chhung chauha hmang a nih hre reng chunga dawr theuh turin Sawrkar Department te, sawrkar hnathawk leh Champhai mipuite chu chahin Bank chu mipuiten rim taka an thawhchhuah an dahthatna a nih thin avangin thawktute chu customer-te lungawina zawng tur leh rintlaka awm turin thawktute a chah bawk.

He Extension Counter-cum-ATM hawnnaah hian Apex Bank Chairman Pi T. Lalmuanpuii pawhin thu sawiin Apex Bank chu Mizote Bank, a hlawkna pawh Mizoram chhung chauha hmang thin a ni tih hre chunga a uar zawka dawr turin kalkhawmte a chah a. Mizoram Cooperative Apex Bank Ltd. hmalakna hrang hrang tarlangin Sawhthing leh Aieng mumal zawka hralh chhuah a nih theihna tura an hmalakna a sawilang bawk.

Extension Counter-cum-ATM hawn zawh hian Pi T. Lalmuanpuii chuan Champhai Apex Bank Branch Office building luah thar, Champhai Vengthlang a mi chu a hawng a. He hunah hian KTP General Conference Pandal thiah hnatlang neiha boral ta C. Vanmawia chhungte hnenah Apex Bank kaltlanga PMJJBY hnuaia Life Insurance cheng singhnih leh PMSBY hnuaia Accidental Insurance cheng singhnih, avaiin cheng singli chu Apex Bank chairman hian a hlan nghal bawk PMJJBY hmang hian kum khata Rs. 330/- chauh chawiin Rs. 2,00,000/- a life insure theih a ni a, PMSBY hmang hian kum khata Rs. 12/- chawiin Accidental Insurance Rs. 2,00,000/- tih theih bawk a ni. Heng sawrkar laipui scheme-te hi Apex Bank-ah la tih zel theih a ni.

Apex Bank Chairman Pi T. Lalmuanpuii chuan Tlangsam leh Kahrawt Venga Primary Agriculture Credit Cooperative Society (PACS)-te office a hawn bakah naktuk hian Leisenzo tlawhin an PACS office a hawng leh ang. PACS-te hi Reserve bank of India phalna neia Bank ang chiaha mipui atanga sum/deposit dawnga loan pe thei niin, Apex Bank enkawlna hnuaiah Mizoram khaw hrang hrangah kalpui chhoh mek a ni a. Apex Bank Chairman hi Pu K. Sanghluna, Apex Bank Board Member leh Bank Official dangten an tawiawm a ni.

Apex Bank-ah hian thawktu nghet163 awmin kum kalta chhung khan help (net profit) chen nuai za ruk chuang an nei a, nikum hmasa lam aia a thanna hi 57% lai a ni bawk.