761/2026-2027

Aizawl the 29th May, 2026: Vawiin khan Secretary State Transport Authority Mizoram chuan thuchhuah siamin Mizoram chhunga Passenger phur chi lirthei-a chuang thin te'n Sorkar approved rate diktak an chawi theihna atana Mizoram leh Digiride Technology Pvt. Ltd., NIT(Mizoram) te tangkawpin an duan Mizotaxi mobile app chu peih fel a ni ta.

Sorkar duhdan angin Aizawl khawpui chhungah bul tan phawt tur a ni ang a, a tahtawlin District dangah pawh kalpui chhoh zel tum a ni.

Aizawl khawpui chhungah hian 'Mizotaxi' app hi July ni 1, 2026 aṭanga hman tan tur a ni a. Chuvangin, Aizawl khawpui chhunga service lai 4-wheeler taxi te, 2-wheeler taxi leh Autorickshaw zawng zawng te chu June 2026 chhungin Mizotaxi Office, DTO(L.A) Office hnuai, Transport Complex, Chaltlangah registration tifel vek tura ngen leh hriattir an ni e.

June 2026 chhunga in register te tan registration fee hi kumkhatah Rs 600/- only (Rs.50/month) a ni ang a, hemi hnulama in register te chu Rs 1000/- an pek a ngai tawh ang.

Mizotaxi application hi playstore/appstore ah download theih turin dahfel a ni tawh a, a hman tan theih hun chu July ni 1, 2026 aṭangin a ni ang.