2690/2022-2023
Kolasib dated 16th November 2022: Vawiin chawhma khan MJA Press Club, Kolasibah ‘National Press Day 2022’ pual a hun hman a ni a, Pu R.Lalhmingthanga, Vice President, MJA, Kolasibin hun kaihruaiin Pu John LT Sanga, Deputy Commissioner chu khuallian a ni a. Pu Hmingthanzuala, District Information & Public Relations Officer leh MJA, Kolasib member-te an tel a ni.

Pu John LT Sanga, Deputy Commissioner chuan thutharlakkhawm hna chu eizawnna piah lam ah ram tan a thawktu pawimawh tak an nih thu sawiin rinawm tak leh langtlang tak a hna thawk zel turin leh thu belhchiandawl leh rintlak chuah chhuah a pawimawh thu a sawi a. Mahni chauh pawh a thu dik tan ngam tur a huaisenna neih leh ram leh mipuiin a an tangkaipui tur thu thar lak khawm thiam a tul thu a sawi bawk a ni. Thutharlakhawmtute kaltlanga thuchhuah chuan mipui rilru sukthlek dan nasa takin a nghawng thin thu Deputy Commissioner chuan sawiin Mizo tawng dik hman kawngah pawh midangte entawntlak ni turin MJA member-te chu a chah a ni.

Pu Hmingthanzuala, DIPRO chuan Registrar of Newspaper for India hnuai a inziahluh pawimawhna te, I&PR kaltlanga Sawrkar Office hrang hrang Advertisement semchhuah dan kalphung te tarlangin rualkhai tak a chanchinbu hrang hrang hnenah sem thin a nih dan a sawi a. Thu dik, a hun tak a, a hre tur tak ten an hriat thinna chuan buaina leh harsatna lian zawk thleng tur a pumpelh phah tir thin thu sawiin chu hna pawimawh tak thawktu MJA, Kolasib te chu, awn lam nei lo turin leh ram tan a thu dik auchhuahpui hna chu thawk chhunzawm zel tuirn a fuih bawk a ni.

Pu Andrew VL Auva, President, MJA, Kolasib chuan kalkhawmte lawmna thu sawiin Kolasib district chhunga Sawrkar hmalakna lian tham te chu a tul angin an vilpui reng tur thu a sawi a, Pu Zairemchhunga, Secretary hnen atangin report ngaihthlak niin Pu R.Lalnunmawia, Treasurer chuan lawmthu sawina hun a hmang bawk a ni.

Kolasib district-ah hian nitin chanchinbu chhuak 10 leh kar tawp chhuah 1 a awm mek a, MJA member 15 an awm bawk a ni.