2691/2022-2023
Aizawl 16th November 2022: Vawiin khan pangpar khawitu pawl Mizoram Florists' Association chuan an kum 25 tlin lawmna Silver Jubillee chu Synod Conference Centre, Mission Veng-ah an hmang. He hunah hian Agriculture Minister Pu C.Lalrinsanga chu khuallian niin Dr Elizabeth Saipari, Director Horticulture Department chu khualzahawm a ni.

Khuallian Pu C.Lalrinsanga chuan Mizoram Florists' Association ten Kum 25 lai an thleng thei chu a lawmpui thu sawiin kan ram cheimawi tura pangpar enkawltu Mizoram Florists' Association chu pawl hlu tak niin pangpar chingtu zingah ei hmuh nan tak taka hmang an awm ta chu thil lawmawm tak a ni a ti.

Minister Pu C.Lalrinsanga chuan pangpar chingtute harsatna tawh pakhat chu leitha a ni a ti a. He mi phuhru tur hian Chief Minister duhsaknain SEDP sum cheng nuai 125 hmangin Chemical tel lo leitha siamna OP12 Bio Fertilizer Unit, Sihphir Neihbawih ramah din fel tawh niin leitha siamchhuah tan mek a ni a ti. Pangpar chingtute tan pawh OP12 Bio Fertilizer hi hman tur a awm dawn a, he leitha hi Agriculture Scientist ten enchhinna(Multi Location Trial)nei tawhin, result tha tak kan nei a, Mizoram khawlai hmunah pawh hna a thawh tur angin a thawk thei dawn a ni tiin a sawi. OP12 Bio Fertilizer Unit kan ramah ngei siamchhuah a lo ni ta hi kan ram kuthnathawktute tan mellung pawimawh tak a ni a ti bawk.

Minister Pu C.Lalrinsanga chuan kan ram tualto pangpar ramdanga hmuh tur awm lo te chin pun theih dan kawng awm se tha a tih thu a sawi a, ramdang miten an ngaihhlut a rin thu leh man man zawka hralhchhuah thei a nih a beisei thu a sawi bakah sawrkarin Agriculture Growth Centre a sak turah Farmers ten an thlai thar an zawrh chhuah ve na tur hmun siam tum a ni a, pangpar chingtute inpho chhuah ve na tur hmun siam tel ve a nih tur thu a sawilang bawk a ni.

Mizoram Florists' Association hian Thupui(Motto) atan 'Mizoram Pangpara tih vul' tih chu hmangin Kum 1997 November thla khan din tan a ni a, tun dinhmunah General Headquarter ah member 500 chuang nei mekin, Mizoram hmun hrang hrangah Branch 26 an ding mek bawk a ni. Florists' Association Member ni tur hian mahni kutkawih ngeia pangpar tharchhuak nih a ngai a, Mizoram Florists' Association hian kum tin Flower Show an huaihawt thin bakah Mizoram sawrkar nena thawk hovin Lengpui Airport leh Mahatma Gandhi lim cheimawi hna an thawk thin bawk a ni.

Vawiin Mizoram Florists' Association Silver Jubillee lawmnaah hian hruaitu hluite chawimawina leh lawmpuina thilpek hlanna hun hman a ni a, khualzahawm Pi Elizabeth Saipari, Director Horticulture Department chuan hruaitu hluite hnenah lawmpuina thil pek a hlan a ni.

Mizoram Florists' Association Silver Jubillee lawmpui nan hian Khuallian Minister Pu C.Lalrinsanga chuan Rs 20000/- a pe bawk a ni.

Vawiin Programme hi Pi Lalnuntluangi Mizoram Florist Association President in a kaihruai a, General Secretary Pi Vanlalzawni hnen atangin Report ngaihthlak a ni.