2692/2022-2023
Champhai, the 16th November, 2022: Labour, Employment, Skill Development & Entrepreneurship (LESDE) Department leh District Skill Committee (DSC) Champhai buatsaihin vawiin chawhma dar 11:30 khan Prime Minister National Apprenticeship Mela (PMNAM) kaltlangin Apprenticeship leh National Apprenticeship Promotion Scheme (NAPS) chungchang inhrilhhriatna I&PR Conference Hall, CHANEM-ah neih a ni.

He hun kaihruaitu District Skill Committee Chairman Pu James Lalrinchhana, District Bawrhsap ni bawk chuan Prime Minister National Apprenticeship Mela kaltlanga inhrilhhriatna tha tak Champhaia buatsaih a ni chu lawmawm a tih thu a sawi a. Skill gap zau tak awm thinte ngaihvena hnawhkhat tura tanlak a tul thu sawiin, chinfel anih vat loh chuan eizawnna, ram sum leh pai mai bakah ram mipui cheng zat leh dinhmun thlenga a nghawng theih thu a tarlang a. Ramri depa awm hmun pawimawh tak Champhai District theihnate zirchian a tul thu leh, theihna ang mil zela mipuite thiam thil pe tura inzirtirna kalpui a tul thu a sawi bawk.

Training-ah hian District Skill Committee Member Secretary Pu Rosangliana, DLEO Champhai chuan hun hman anih chhante a sawifiah a. Pu Zothankhuma, Inspector of Factory, LESDE Department leh Pu ZL Chhunga, Sr. Consultant, STRIVE te'n kalkhawmte zirtirna an pe a ni.

Prime Minister National Apprenticeship Mela (PMNAM) kaltlangin Mela ang pui pui huaihawt a la remchan loh avangin hemi chungchanga pawimawhte inhrilhhriatna sensitization/ awareness programme hi buatsaih a ni a. He hunah hian District Skill Committee Member, Champhai Grape Growers Society, H&C Design Group, Social Justice Development India, Kobod Incorporation Private Ltd. hotute an tel a ni.

Ministry of Skill Development & Entrepreneurship hnuaia Prime Minister National Apprenticeship Mela (PMNAM) kalpui hi thla tin Thawhtanni vawi hnihna apianga neih tura ruahman niin, National Apprenticeship Promotion Scheme (NAPS) chawilar nana tih a ni a, he scheme hnuaiah hian hamthatna tha tak takte a awm a ni. Mizoramah chuan District 4 ahte training hi kalpui a ni a; Siaha, Lunglei leh Aizawl-ahte neih tawh niin, vawiin hian Champhaiah neih a ni leh a ni.