2693/2022-2023
Dated Serchhip, the 16th November, 2022: Vawiin khan Serchhip Officers' Club te buatsaih Serchhip khawpui chhunga sawrkar Department hrang hranga thawktute infiamna, Serchhip Town Inter- Departments Sports, 2022 chu Serchhip Sports Stadium ah bawrhsap Pi Nazuk Kumar, IAS in a hawng.

A hawnna thu sawiin Pi Nazuk Kumar chuan, sawrkar hnathawkte hi department hrang hrangah kan awm hlawm a, hna erawh kawng tinrengin kan thawkho thung. Chuvang chuan inunauna tha leh thawhhona tha tak kan neih a tul hle thin. Vawiina Inter- Departments Sports, Serchhip Officers' Club ten an buatsaih hi inunauna leh inthian that nan a tangkai em em a ni. Tin, sawrkar hnathawk te hian taksa leh rilru hrisel neih kan mamawh a, ram leh mipuite tana kan theihna sang ber kan hlan theih nan taksa sawizawina kan uar a tul hle a ni. Chuvang chuan sawrkar hnathawk zawng zawng te infiamna discipline engemaw tak ti thin turin ka ngen a, Serchhip Officers' Club pawhin a theih phawt chuan kum khatah vawi khat chauh nilovin vawi hnih pawh buatsaih thei hial se a tha hle a ni, a ti.

Serchhip Town Inter- Departments Sports hi ni hnih chhung neih tura ruahman a ni a, Departments te chu Group pariat ah inthen darhin inelna hrang hrang heng; Badminton, Corrom Board, Chinese Checker, Dart Throw, Penalty Shoot, Ketaminu Race, Spoon Relay Race, Sairawkherh inperhsiak, Table Tennis leh Shooting ah te inelna an buatsaih a ni.

Serchhip Officers' Club te hian Inthlanpui neih kum (General Election) emaw harsatna dangin a tlak buak loh chuan kumtin Inter Departments Sports hi an buatsaih thin a, tun tumah pawh hian sawrkar hnathawkten an hlut hle a ni.