2694/2022-2023
Sahmulphah thla ni 16, 2022: Mizoram Sawrkar Health & Family Welfare Department hnuaia National Health Mission (NHM)-in State chhunga Ayushman Bharat - Health & Wellness Centre (AB-HWC) tina health mela (hriselna kutpui) buatsaih tura a ruahman angin, nimin khan Lawngtlai Vengpui HWC huam chhunga mite tan Don Bosco School, Lawngtlaiah health mela hi buatsaih a ni.

He health mela-ah hian natna chi hrang hrang inentirna te, zuk leh hmuam kaihhnawih (tobacco), rilru hriselna (mental health), taksa hriselna leh thianghlimna (hygiene) leh ei leh in (diet) chungchang leh nun dan hrisel chungchang inzirtirna leh counselling te, India khua leh tui tinin hriselna kaihhnawih ID hran (Unique Health ID) an neih tur atana Ayushman Bharat Health Account (ABHA) Health ID siam leh AB-PMJAY Golden Card siam te kalpui a ni a. Inentirna leh damdawi te a thlawna pek chhuah niin, mi 170-in he health mela-a inentirna leh service dang hi an chhim a ni.

Lawngtlai District chhungah hian Health & Wellness Centre 21 awmin, he'ng HWC hrang hrangte hian a tahtawlin anmahni remchan danin health mela hi an buatsaih chho zel dawn a ni.

Attachment

  • Loading attachment...