Vawiin khan Mizoram Journalists' Association (MJA) Kolasib District chuan tunkar tawpa chhuak tur Kolasib DC Pu Jitender Yadav chu ama office a thlahna hun hmangin ngaihhruina thuziak an hlan.
Kolasib DC Pu Jitender Yadav chuan kum hnih chhung Kolasib DC hna a chelh chhungin MJA, Kolasib District nen thawhhona tha an neih thusawiin an tawiawmna zawng zawngah lawmthu a sawi a. Mizoram a awm chhungin thil tam tak a zir thu sawiin Mizoram leh a bikin Kolasib mipuite chu a rilru ah an cham reng dawn a ni, a ti a. Thuthar thehdarhtu te chu mipui inrelbawlna sawrkarah lungthu pawimawh zinga pakhat an ni tiin chanchinbu mite chu dikna leh mipui tan ding zel turin a chah a ni.
Hun kaihruaitu MJA Kolasib District President Pu H. Vanlalnghaka chuan Kolasib DC Pu Jitender Yadava'n nasa takin District hmasawn nan leh Kolasib mipuite tan hna a thawh thu sawiin a sulhnu te chu fakawm a tih thu a sawi bawk.
He hunah hian Pu H. Vanlalnghaka chuan 'Ngaihhruina Thuziak' MJA Kolasib District in an buatsaih chu DC hnenah hlan a ni. MJA Kolasib District member te an tel kim hle a ni.
