Vawiin khan MJA Dist. Hqrs. Lunglei member 11 leh an hruaitu Serchhip DIPRO Andrew H Lalremruata hova Press Tour nei a Tripura, Agartala tlawh mektute chuan Pathalia, Rubber Plantation Corporation (RPC) an tlawh a, Ranjan Debnath State manager chuan lo dawngsawngin, Rubber an chinna hmun leh a sawngbawlna dan te a hmunah an en. Mimal Rubber ching hlawhtling Mr. Ajit Nag an kawm bawk.

MJA te hian Rubber Plantation Board ten an sawngbawl dan hrang hrangte zawtin an sawipui a, an hriat duh hrang hrangte pawh an zawt bawk. Pathalia hmuna Rubber an chinte hi Malaysia atanga an lakluh RRIM 600 an tih a ni a, he lai hmunah chuan a tha ber pawl niin an sawi. GTI leh RRII te pawh an ching nual bawk.

MJA te hian vawiin vek khan India leh Bangladesh inrina hmun (Border) te an tlawh a, Bangladesh atanga Cement, Sangha leh Rora an lakluhna hmunte pawh an tlawh a ni. Vawiin vek khan MJA Lunglei member te hian Renglal In (Ujjayanta Palace) an tlawh bawk a ni.

Naktukah Baramura Gas Thermal Plant an tlawh ang a, hei bakah hian zan dar 6:30 ah Agartala, Chief Minister, Manik Sarkar nen Secretariat Conference Hall-I ah an inkawm ang.

MJA Lunglei Agartala tlawhtute hi Tripura Sorkar chuan State Guest angin a lo dawngsawng a, State Guest House changkang takah an lo thlen tir a ni.