Delhi-a Press Tour-ah zin mek Mizoram Journalists’ Association member mi 10 (sawm) te chuan September ni 18 khan Press Council of India (PCI) office, Soochna Bhawan an tlawh a, PCI Chairman Justice Markandey Katju chu hmu in, inkhawmhona hun tha tak an nei. Justice Katju chuan Mizoram chanchinbu mite chu Mizoram chanchin, Mizorama press mite leh chanchinbute dinhmun chungchangte a zawt a, harsatna an neihte pawh a zawt bawk. Mizoram chanchinbu mite hian RNI lamah harsatna an tawh dan an hrilh a, Justice Katju hian RNI chungchang chu State kilkhawr zawka awmte tan awlsam zawka online a tih theih dan kawng a dap tur thu a lo hrilh a ni.

September ni 19 vek khan MJA member te chuan cheng vaibelchhe 60 senga sak leh thla hmasa lawka Prime Minister in a hawn National Media Centre an tlawh a. Ministry of Information & Broadcasting-a officer pahnih ten chanchinbu mite hi an lo dawng sawng a, National Media Centre an fanpui nghal bawk.

September ni 19 khan MJA member te chuan Lok Sabha MP, Pu C.L. Ruala hmalakna bawkin Supreme Court an tlawh a, court hearing nei lai mekte chu thlirin, urhsun taka Court kalhmang TV lamah an lo hmuh thin chu a takin an ngaithla a ni. MJA member te hi vannei an inti hle a, Supreme Court hi tlawh har tak a ni mai bakah Supreme Court Judge leh Advocate te recommend loh chuan a luh thei lo a ni. Nimin khan Fundamental Rights chungchanga case pawimawh tak, Supreme Court Chief Justice, Justice P Sathasivam leh Supreme Court Judge dang pali telna Full Bench in an ngaituah lai mek chu a hmunah ngei MJA member te hian an ngaithla a ni. Hei bakah hian Division Bench (Judge pathum telna) thu ngaituah lai mek pawh an ngaithla bawk.

September ni 19 vek khan Qutub Minar, Red Fort, Old Delhi, Connaught Place leh Lotus Temple te an tlawh bawk a ni. Nizan khan MJA member leh DZMP hruaitute chuan Mizoram House- Vasant Vihar-ah inkawmhona hun tha tak an nei bawk. Press Tour a kal te hi naktuk (Inrinni) tlai lamah Aizawl lo thleng tura beisei an ni.