96/2022-2023
Aizawl, the 8th April 2022: Vawiin khan Mizoram Journalists’ Assciation Gen. Hqrs. te chuan Information & Public Relations Director pension-a chhuak ta Pi Lallianpuii, MIS, thlahna leh I&PR Director thar Pu C. Lalnunkima, MIS, lawmna hun chu Aizawl Press Club-ah an hmang.

MJA Vice-President Pu Lalremsiama kaihhruai thlahna leh lawmna inkhawmah hian I&PR Director Pu C. Lalnunkima chuan MJA ten an hun buai tak karah an tan liau liaua hun hmansaka chawimawina ropui tak an pe chu lawmawm a tih thu a sawi a. Kum tam tak liam ta chhungin I&PR leh MJA inkara thawhhona tha tak awm thin chu chhawm nung reng a, hun lo kal zel turah pawh MJA-ten sorkar hmalaknate tawiawm leh thlawp zel turin a chah. I&PR Department leh MJA te hmasawnna leh that tlan zelna tur atan theihtawp a chhuah tur thu sawiin Pu C. Lalnunkima chuan thuziak lamah fimkhur a pawimawhzia a tarlang a; tunlai social media bikah Mizo tawng hmansualna nasa tak karah Mizo tawng hman dan dik kawngah tan lak a tulzia a sawi bawk.

I&PR Director pension-a chhuak ta Pi Lallianpuii pawhin thu sawiin a Director hun chhunga MJA te nena thawhhona tha tak an nei thei chu lawmawm a tih thu sawiin hun lo kal zel tur atan duhsakna a hlan a ni.

MJA President Pu C. Lalrambuatsaiha chuan I&PR Department leh MJA te chu ‘Information chhungkua’ an nih angin Director chhuak ta leh Director thar chu an ngaihhlutzia lantir nan he hun hi buatsaih a nih thu a sawi a. Sorkar hnathawk zingah pawh pension thleng thawk theilote emaw department-a top post thleng lo tam tak an awm laiin I&PR Director-te pahnih chuan an Service-ah pawh a tawp an thleng thei chu an lawmpui takzet a, Mizovin ‘Thangchhuah Nu / Thangchhuah Pa’ an tih thin chu an ni ber a ni a ti. MJA President Pu C. Lalrambuatsaiha chuan Director chhuak ta Pi Lallianpuii leh Director thar Pu C. Lalnunkima te chu ngaihhruina leh lawmpuina thilpek a hlan nghal a ni.