2522/2026-2027

Aizawl, the 6th October, 2026: Vawiin khan Mizoram Journalists’ Association Gen. Hqrs. te chuan Information & Public Relations Director pension-a chhuak ta Pi K. Vanlalsangi thlahna leh Director thar Pi Mina Zoliani Joute lawmpuina hun chu Aizawl Press Club-ah an hmang.

He hunah hian I&PR Director chhuak ta Pi K. Vanlalsangi chuan thu a sawi a, MJA ten hun tha tak an buatsaihsak avanga lawmthu sawiin, I&PR-a a thawh chhung zawnga MJA te thlawpna avang leh thawhhona tha tak an neih thin avangin lawmthu a sawi. MJA leh I&PR inkarah inunauna tha tak awm chhunzawm zel se a duh thu sawiin, Director thar te nena thawhhona tha tak nei zel turin a duhsakna a hlan nghal a ni.

I&PR Director thar Pi Mina Zoliani Joute pawhin thu sawiin, MJA ten I&PR Director chhuak ta te thlahna leh a lut thar te lawmpuina hun hman atanga an buatsaih thin chu lawmawm a tih thu a sawi a, inchawimawina hun ropui tak a ni, a ti. MJA leh I&PR te chuan thawhhona tha tak hman ata an nei tawh thin tih a sawi a, thawhhona tha tak an neih chhunzawm zel a beisei thu a sawi bawk. Director chuan I&PR chu MJA te tan Nodal Department a nih angin fin chhuah an ngaihna laiah te fin chhuah zel turin a chah a, I&PR office-a leng lut tam thin turin MJA member te chu a sawm bawk a ni.

Vawiin hun hmannaah hian MJA President Pu Vanlalrema Vantawl pawhin thu sawiin, MJA te chu ziakmi an nih angin ngaihhruina leh lawmpuina thilpek chu ziaka inpek an duh thu a sawi a, MJA te an thlawp thina zawng zawngah lawmthu a sawi bawk. MJA President chuan Pi K. Vanlalsangi chu a Director chhunga MJA te hmasawn nana a hnathawh zawng zawngah lawmthu a sawi a, a kal lehzelna turah duhsakna a hlan nghal a ni. MJA leh I&PR te chuan inlaichinna tha tak an nei thin tih sawiin, journalism-in hma a sawn chuan ram leh hnamin hma a sawn thin a ni, a ti a, thuk leh zual zawka inlaichinna tha siam turin kalkhawmte chu a chah a ni. MJA te chuan hmachhawp tam tak an nei tih sawiin, I&PR Director thar hona hnuaiah hma an sawn zel a beisei thu a sawi bawk.

Vawiin inkhawm hi MJA Vice President Pu C. Lalhmachhuana chuan a kai hruai a, MJA President Pu Vanlalrema Vantawl chuan Director chhuak ta Pi K. Vanlalsangi leh Director thar Pi Mina Zoliani Joute te chu ngaihhruina leh lawmpuina thilpek a hlan nghal a. MJA member te leh I&PR Officer ten he hun hi an hmanpui a ni.