2314/2023-2024

Lawngtlai dated 13th October 2023: Vawiin chawhnu khan Lawngtlai district-a MLA inthlan kalpui chhung a Expenditure Observer tur a ruat Pu Ranjeet Pawar, IRAS chuan DC Conference Hall, Lawngtlaiah thutharlakhawmtute kawmin Lawngtlai district chu district ralmuang tak a nih angin inthlanna felfai leh langtlang tak kalpui a nih ngei a beisei thu a sawi. 

He inkawmhona hun hi Pu C.Lalhmingthanga, District Election Officer-in kaihruaiin Pu R.Lokeshwaran, IPS, Superintendent of Police, Returning Officer leh Assistant Returning Officer-te an tel a ni. Pu Ranjeet Pawar, IRAS, Expenditure Observer chuan Chanchinbu leh thu thehdarh nana Electronic Media hrang hrangte chu Political party emaw candidate-te thlei bik nei lova inkhairual tak a enkawl a pawimawh thu a sawi a. Inthlanna felfai leh langtlang kalpui a nih theih nan mipui zirtirtu leh kaihruaitu a hmang turin thutharlakhawmtute chu a chah.

Mipuiten vote thlak pawimawhna an hriat theih nan chanchinbu leh Media hrang hrangte chu inzirtirna hmanrua a hmang turin Pu Ranjeet Pawar chuan thutharlakhawmtute chu hrilhin Political party leh candidate-te Campaign senso pawh uluk tak a vil a nih tur thu a sawi. Campaign senso tha tak a chhui zui leh chhinchhiah a nih theih nan Lawngtlai district chhung a Bank hrang hrangte chuan Political party leh candidate-te sum hman tur chu Cheque emaw Demand Draft hmang a tih zel a pawimawh thu a sawi. 

Pu R.Lokeshwaran, IPS, SP, Lawngtlai chuan MLA inthlang tur a inpuahchah chhung leh inthlanna zawh fel thleng a dan leh thupek kenkawh kawng a ruahmanna siam a nih dan sawiin Election Model Code of Conduct bawhchhiatna veng turin Flying Squad Team-te pawh a tul angin an chet chhuah thu a sawi a. Harstana neite chuan phone number 1950 hmangin District Contact Centre biak pawh theih reng a nih thu sawi a ni bawk.

Lawngtlai district-ah hian Voter 91439 awmin 36-Tuichawng Assembly Constituency-ah voter 36042 an awm a, 37-Lawngtlai West ah voter 29493 awmin 38-Lawngtlai East ah voter 25904 an awm bawk a ni. Voter awm zat atanga 45685 chu mipa an ni a, 45754 chu hmeichhia an ni. Lawngtlai district-ah hian Service Voter 232 awm anga chhinchhiah a ni bawk.