Ni 25 November, 2013-a MLA General Election lo awm turah vawiin khan Champhai District Election Officer Pu Lalthangpuia Sailo IAS chuan mipuite hnenah inthlan thuchah a sawi.

Champhai District Election Officer Pu Lalthangpuia Sailo IAS chuan, MLA General Election 2013 kan hmachhawn mekah Champhai District chuan tuna kan tihtur chin chu kan ti zo thawkhat tawh a. August thla atang khan inpuahchah ni tawhin Office hour bakah Holiday-ah te pawh kan buai hle thin a, tunah hian inthlang mai thei turin kan inpeih tawh a ni a ti.    District Election Officer chuan, tun Election-ah hian kum dang aia thil thar a tam zawk thu sawiin, Election leh DC Office a hna thawk sate bakah Department danga Sawkar hna thawkte nen tangrualin hna kan thawk a,  tihdan ngai loh, hriatthar a tam avanga bangbo na lai te pawh a awm a, a thawkte bakah Candidates te leh mipui inthlan lam buaipuitute tan pawh a buaithlak hle a ni ati. Aizawl anga thil tih zung zung a theihloh thu sawiin, mipuite harsatna leh mamawh pawh tih zung zung theih lohna laiah mipuite hriatthiamna a ngen bawk.

Pu Lalthangpuia Sailo IAS chuan, Model Code of Conduct (MCC) ah chuan thil thar em em a awm lo nain tun tum Election-ah hian a tir atangin khawng taka ken kawh a ni a, chu chuan Party leh Candidate te awlsamna te pawh a siam a, khawtlang a tinuam in boruak pawh a timuanawm em em a ni a ti. Mizo People Forum (MPF) hruaitute leh Member te tawiawmna avangin vawiin thleng hian boruak a tha hle a ni ati a, thil duhawm lo thleng pawh hriat a la awmlo chu lawmawm a tih thu a sawi bawk.

DC chuan, Tun inthlan atan hian Election Commission in thil thar a rawn siam avangin helai Election Office-ah pawh Media Certificate & Monitoring Committee (MCMC) te, Model Code of Conduct (MCC) te leh Call Centre Complaint Room te pawh Office hran siamin Officer & Staff te’n heng hi an thutchilh reng a. Tul bik thila rawn be duh tan MCC Complaint Room & Call Centre 03831-235604,  03831-234882 leh 9862511613 ah te hian biakpawh theih reng a ni a ti a, Election Commission in thil a duhtui a, sum leh pai, mihring, tha, Team hrang hrang leh Committee, Polling Party leh Micro Observer leh a dangte indaih loh chu na duh hle mah se, tluang tak leh tha taka an ti chho zel thei chu lawmawm a tih thu a sawi bawk.

DC chuan, Polling Parties te, Micro Observer te, Election in a kaihhnawih chungchang a Training hrang hrang te uluk taka neih a nih tawh thu a sawi a. Ni 23th & 24th November 2013 ah hian Polling Parties te pawh an chhuak tan dawn a ni ati.

Champhai District hi Election Obserer pasarih (7) in min vil a, chak taka hna thawh a ni chu a lawmawm hle a ni ati a, Candidate te Expenditure chhutsak turin Accounting Team an awm a, Flying Squad leh pawl dang dang te’n Champhai District chhung hi an vil chhuak reng bawk a, tunah hian Nagaland atangin Naga Police leh State Police an lo thleng tawh a, venhimna pawh uluk taka tih niin harsatna pawh a awmlo tura a ngaih thu a sawi bawk. Champhai District Election Officer chuan November ni 25 zing Dar 7:00 atanga tlailam Dar 4:00 thleng Vote thlak tur a ni tih sawiin, mitinin Vote thlak hi kan mawhphurhna a ni tih hriaa Vote thlak vek turin a ngen bawk a, India rama awm, Democracy hnuaia awm kan nih angin a mi cheng te chuan Vote thlak hi kan tihmakmawh a ni tih sawi bawkin, Vote thlak vek turin mipuite a sawm a, Candidate te zinga an duhzawng mi an awmlo anih pawhin NOTA (None Of The Above) ah tal hmet tura Vote thlak theuh turin Champhai District mipuite a chah bawk a ni.