No.6957/2020-2021

Vawiin khan Lawngtlai East bialtu MLA, Agriculture Development Board Vice Chairman ni bawk Pu H. Biakzaua chuan Land Resources, Soil & Water Conservation Department hnuaia Lawngtlai District chhunga Sihtlangpui khua leh Chawntlangpui khuaa thelret (rubber) chingtute hman tur, thelret sawngbawlna khawl, 'rubber rolling machine' leh a kaihhnawih hmanraw dang LRS&WC Department-in subsidy kal tlanga an ruahman chu a hlan a. Thelret chingtute hnena pek chhawn tur he'ng bungraw phurtu lirtheite hi LRS&WC, Lawngtlai District Office tual atangin a vai liam nghal a ni.

Khawl sem puala inkhawm tawi buatsaihah Pu H. Biakzaua chuan thu sawiin, LRS&WC hma laknaa Lawngtlai District chhunga kut hna thawktu eng emaw zatin thelret hmun an siam leh tun dinhmuna kung 2000 chuang hnai tur a awm thei chu lawmawm a tih thu a sawi a. Thelret sawngbawl chu a tih dan bik te awm leh thiam ngai tak a nih avangin department-in kut hna thawktute a zirtir bakah, a sawngbawlna khawl nen lam a ngaihtuahsak chu lawmawm a tih thu sawiin, thelret sawngbawlna khawl sem chhuah ni chu Lawngtlai District tan ni chhinchhiah tlak tak a ni, a ti.

Pu H. Biakzaua chuan thelret hmun siam chu chhungkaw inchawmna tling a ni a, kum 25 chhung hlawk taka hnai theih a nih avangin kut hna thawktute paw'n intihhmuh chi tak a ni, a ti a. Thelret chin chu khawvel boruak chhe zel tur ven nan leh hna hmu lo tam tak tana hna thawh tur siam nan pawh thil tha tak a ni, a ti. 

He hun, LRS&WC Lawngtlai District Officer Pu PT Vanrosiama kaihhruaiah hian LADC-a MDC eng emaw zat bakah, line department official leh thelret chingtute an tel a. Tuipang Range SCD (Soil Conservation Demonstrator) Pu Sangawia'n hunserh hmangin, thelret chingtute ai awhin Pu H. Lalramnghaka, Sihtlangpui chuan thu a sawi a. Soil Conservation Demonstrator Pu H. Liankima'n khawl hman dan leh thelret hnai dan a sawi fiah a ni.

Thelret sawngbawlna khawl leh hmanraw dangte hi Sihtlangpui leh Chawntlangpuiah pakhat ve ve pek chhuah niin, beneficiary-te'n Rs 10,000/-in an do let ve a. Vawiina sem chhuahah hian Sihtlangpuia LRS&WC Smoked House-a dah tur khawl pakhat a tel bawk.