Chief Minister Pu Zoramthanga chuan vawiin khan Hnahthialah District Horticulture Office thar hawngin, district office hmunpui, district secretariat dinna tur lungphum a phum bawk a ni. Chief Minister hi bialtu MLA Health Minister Dr. R. Lalthangliana leh Horticulture Development Board Vice Chairman Prof. F. Lalnunmawia ten an tawiawm a ni.

Office thar hawnna leh dinna tur lungphum puala inkhawm tawi Electric Veng Community Hall, Hnahthial a buatsaih ah khuallian Chief Minister chuan Hnahthial district tan hmasawnna ruhrel din belh zel a nih tur sawiin, vawiin office thar hawn tak pawh tangkai taka an chhawr a beisei thu a sawi a. Mizoram tan chuan ei leh in lama intodelhna atan horticulture a pawimawh bakah economy thanna tur atana hlawk taka thawktu a nih chhoh zel theih tur thu a sawi.

District office hmunpui siam chungchangah Chief Minister chuan office dawrtu tur mipui ten hmun hrang hranga veng hrang hranga kal kual ngailo in hmun khata an dawr zung zung theih nan ruahmanna siam a nih thu sawiin, hmun khatah department hrang hrang office-te chu a leng chin chin dahkhawm a nih tur thu a sawi a. Hemi hian office thawktute karah thawhhona tha zawk pawh a thlen ngei a rin thu a sawi. 

Chief Minister chuan sawrkarin hmasawnna thlen tura a hmachhawpte chu hripui leng avanga chak taka bawhzui theih a nilo chungin hmalak theihna lai laiah nasa taka hmalak a nih thu sawiin, hrileng a ziaawm zel a, nun pangngaia kan nun theih hunah chuan nasa taka hmalak belh a nih tur thu a sawi a. Sawrkar chuan hmathlir tha tak nen, ngaihtuahna puitling tak hmangin ram pum tana tha turin theihtawp a chhuah zel thu a sawi a. Zoram mipuiten ram hausakna  haichhuak thiam a, ram sawn nan theihtawp chhuahpui turin mipui a sawm a ni.

Khualzahawm Health Minister Dr. R. Lalthangliana chuan Hnahthial district tan vawiin chu ni chhinchhiahtlak tak a ni tiin district chhunga kuthnathawk a eizawngtute tan a tangkai hle tur thu a sawi a. District tichangtlung tura department hrang hrang ten Hnahthial district chhunga an hmachhawp te sawiin, Minister chuan Covid hrileng sawrkarin theih ang angin hna a thawk chho zelin hmasawnna hmuh tur hrang hrang a awm chho zel chu lawmawm a ti a. Hrileng awmlo phei se tun aia district office tam zawk a awm tawh a rinawm thu a sawi a. Covid hrilengah Pathian kaihhruaina Mizoram a dawn thu Health Minister chuan sawiin, Mizoram hi Covid19 hmachhawnna kawnga a thawh that hle thu sawiin Minister Dr. R. Lalthangliana chuan heihi Chief Minister in theihtawp chhuaha a kaihhruaina vang a ni a ti.

Khual tha Prof. F. Lalnunmawia, Horticulture Development Board Vice-Chairman chuan thuneihna semzai zawnga inrelbawlna chu rualkhai zawka ramin hma a sawn theihna tura pawimawh tak a nih thu a sawi a. Chu hlawkna chhawr hmasa pawl Hnahthial district an ni chu a lawmpui thu sawiin, vawiina office thar hawn chuan hmasawnna dik tak a thlen theih nan bial chhung farmer te pawhin heng office thar te hi chhawr tangkai nachang hre tura chah in, a duhsakna a hlan a ni.

Hun kaihhruaitu Additional Chief Secretary, Horticulture Department Pu J.C Ramthanga chuan DHO office thar hawn a ni ta chu lawmawm a tih thu leh District office complex changtlung tak din zawh thuai a beisei thu a sawi. Horticulture department director Pi Elizabeth Saipari chuan Hnahthial chu thlai leh thei thahnem taka tharchhuah theihna potential nei tha em em a nih thu a sawi bawk. Hnahthial Town VC Association Chairman chuan Hnahthial khua in sawrkar hmalakna avanga an lawm thu a sawi a. Hun hi Hnahthial DC Pu Vanlalmawia chuan lawmthu sawiin a khar a ni.

District thar pathum a district secretariat sakna atan Rs. 10 crores theuh dah a ni a. Hnahthial district office complex hi chhawng thum (ground floor, first floor leh second floor) awm tura ruahman niin, meter 786.45 sq metre bial bawr vela zau tur a ni.