2742/2023-2024

Kolasib Vote thlak dan.pdf

2023 Sahmulphah thla ni 7: Mizoram Legislative Assembly Inthlanpui, 2023 buatsaihah Kolasib District chhunga assembly constituency pathum - 4-Tuirial (ST), 5-Kolasib (ST) leh 6-Serlui (ST) biala polling station 89-ahte vawiin khan tluang takin vote thlak a ni.

Polling station tinah Electronic Voting Machine (EVM) khawl ṭhat leh ṭhat loh enchhin nana mock poll neih hmasak a nih hnuah, zing dar 7-ah MLA Inthlanpui vote thlak hi ṭan a ni a. Tlai dar 4 thlengin vote thlak hun hawn niin, hemi hun chhunga vote thlak zawh hman lohna polling station ṭhenkhatah chuan polling area-a lut hman chin tan hun hi pawh sei a ni.

MLA Inthlanpui 2023-ah hian Kolasib District Election Officer Pu John LT Sanga chu 5-Kolasib (ST) Assembly Constituency-ah Returning Officer a ni a; 4-Tuirial (ST) Assembly Constituency-ah Deputy District Election Officer Pi Melody Ngurthantluangi chu Returning Officer niin, 6-Serlui (ST) Assembly Constituency-ah Kolasib DRDO Project Director Pu Lalmuan Puia chu Returning Officer a ni thung a; RO-te hi Assistant RO pahnih ṭheuhvin an pui bawk.

Kolasib District chhunga assembly bial pathuma MLA Inthlanpui buatsaih hi General Observer Pu Anant Lal Gyani, Expenditure Observer Pu Karni Dan leh Police Observer Pu S. Chaitanya te'n ṭhut chilhin, an vil bawk a. Observer-te leh RO-te hian inthlan kalpui dan endikin polling station hrang hrang an tlawh kual bawk a ni.

Kolasib District chhungah hian polling station 89 (Tuirial bialah 26, Kolasib bialah 29 leh Serlui bialah 34) a awm a. Tuirial biala polling station 3, Kolasib biala polling station 4 leh Serlui biala polling station 3, a zavaiin polling station 10 chu hmeichhe hlang duty-na (all women managed) polling station a ni a. 5/26-Saidan (Kolasib) Polling Station chu polling station dangdai bik (unique polling station) atana cheibawl niin, voter-te hip thei turin ngaw leh nungcha lam hawi (forest theme)-a chei a ni a. 5/28-Project Veng-II (Kolasib) Polling Station chu intlar ngaih lohna (queueless) polling station atana ruahman niin, vote thlak turte chu a chhungkua zelin an kal hun tur hunbi (time slot) ruahmana hrilh lawk vek an ni a; vote thlak tura hun tam tak khawh ral leh intlar ngai lovin voter-te chuan mahni vote thlak hun zelah polling station an pan thei hlawm a ni.

Kolasib District-a polling station 89-ahte hian polling party-te'n inthlan buaipuiin, tluang takin vote thlak a ni a. Kolasib District chhunga sector ṭhen 16-a Sector Officer-te chuan an huam chhung polling station-a vote thlak hi an vil reng a. Kolasib District chhunga critical polling station 7 te pawh a vil tura ruat bik Micro Observer-te'n an vil reng bawk a ni.

Kolasib District huam chhunga assembly constituency 3-a polling station 89 awmah vote thlak nana hman Electoral Voting Machine (EVM)-ah vote awm thei zawng zawng 63,456 (mipa 30,595 leh hmeichhia 32,861) aṭangin tlai dar 4 thleng khan vote 50,899 (mipa 23,733 leh hmeichhia 27,166) a tla a, chu chu 80.21% a ni.

Tuirial biala polling station 26-ah vote awm thei zawng zawng 18,366 (mipa 8,991 leh hmeichhia 9,375) aṭangin tlai dar 4 thleng khan EVM-ah vote 14,843 (mipa 7,057 leh hmeichhia 7,786) a tla a, chu chu 80.82% a ni.

Kolasib biala polling station 29-ah vote awm thei zawng zawng 23,970 (mipa 11,296 leh hmeichhia 12,674) aṭangin tlai dar 4 thleng khan EVM-ah vote 18,520 (mipa 8,312 leh hmeichhia 10,208) a tla a, chu chu 77.26% a ni.

Serlui biala polling station 34-ah vote awm thei zawng zawng 21,120 (mipa 10,308 leh hmeichhia 10,812) aṭangin tlai dar 4 thleng khan EVM-ah vote 17,536 (mipa 8,364 leh hmeichhia 9,172) a tla a, chu chu 83.03% a ni.

Kum upa leh vohbik, vote thlak tura polling station pan harsatte leh election duty leh essential service duty avanga inthlan nia mahni vote neihna polling station hmuna vote thlak thei lo turte tana postal ballot hmanga vote thlak theihna hawnah, hriat theih chinah Kolasib District-ah postal ballot vote tla 975 a awm a. Vawiin tlai dar 4 thlenga EVM vote tla leh postal ballot vote tla zat belh khawm chu 51,874 a ni a, chu chu vote awm thei zat (63,456) aṭangin 81.75% a ni.

Kolasib District chhunga polling station 89-a inthlan buatsaihtu polling party-te hian vote thlak zawh fel hnuah Kolasib an pan khawm leh nghal a. District Election Officer leh Returning Officer-te hovin strong room awmna, Government Kolasib College-ah lo hmuah niin, EVM/VVPAT chu strong room-ah dah luh a, kalh hnan nghal a ni a. Strong room hi sipaite'n an veng zui nghal a. Ruahman lawk dan chuan, MLA Inthlanpui 2023-a Kolasib District chhunga vote tlate hi December ni 3, 2023 (Pathianni) khian Government Kolasib College-a Counting Hall pathumah chhiar a ni ang.