2743/2023-2024

Aizawl, 07.11.2023: Mizoram Legislative Assembly Inthlanpui, 2023 chu vawiin khan neih a ni a. Aizawl District a constituency sawm leh pahnih a polling station 321 ah zan dar 8:30 pm thleng khan vote 77.47% tla tawh a chhinchhiah a ni a. Polling party 321 zingah 135 an lo thleng tawh bawk.

Aizawl DC Pi Nazuk Kumar, District Election Officer ni bawk chuan zingkar atang khan Polling station hrang hrang tlawhin mock poll an ti lai te a enpui a. General Observer leh Expenditure Observer te pawhin khawpui chhung polling station hrang hrangte an tlawh bawk. Polling station tinah Electronic Voting Machine (EVM) khawl ṭhat leh ṭhat loh enchhin nana mock poll neih hmasak a nih hnuah zing dar 7 ah MLA Inthlanpui vote thlak tan a ni. Aizawl District ah hian a vaiin voter 2,86,816 awmin, mipa 1,34,258 leh hmeichhe voter 1,52,558 an awm a ni.

Aizawl District chhungah hian vote thlak tur ten harsatna an tawh loh nan ruahmanna hrang hrang siam a ni a. Kum upa lam te, Persons with Disabilities leh taksa chaklo te chu a tul anga puitu tur ruat an ni a. Polling station 4 chu Model Polling Station a ruat niin Unique Polling Station 2 buatsaih a ni bawk. Heng hmunah hian chawlhbuk te, naupang awm tleina tur 'creche' facility te, wheelchair leh adangte dah a ni a. Hmun thenkhat ah EVM hman dan inzirtirna chhawp a ni bawk. MPF duty te'n voter te lo puiin, Bharat Scouts & Guides te polling station hrang hrangah kum upa lam leh taksa chaklo zawk puih ngai te a tul anga pui turin an duty bawk a. Mipui, pawl leh sawrkar department thawhhona zarah medical duty a thlawn a thisen sang leh zun thlum check a lo duty te pawh veng thenkhatah an awm a ni.

SVEEP hmalakna kaltlangin Selfie Contest buatsaih a ni bawk a. Polling station thenkhatah selfie booth dah a ni bawk. Inthlan pual hian chanchinbu editorial inelna buatsaih a ni bawk a. Heng intihsiakna a lawmman dawng tura thlante chu nidangah la puan a ni ang.