2526/2023-2024

2023 Khuangchawi thla ni 27: Vawiin tlai khan Kolasib District Election Officer Pu John LT Sanga, 5-Kolasib (ST) Assembly Constituency Returning Officer ni bawk chuan Kolasib DC Conference Hall-ah thu thar theh darhtute kawmin, Mizoram Legislative Assembly Inthlanpui, 2023 buatsaih tura Kolasib District chhunga inpuahchahna kalpui mek chungchanga thil pawimawh hrang hrang a sawipui.

Kolasib DEO Pu John LT Sanga chuan MLA Inthlanpui 2023 buatsaih tur atana inpuahchahnaah tun kar chhungin hmasawnna tam tak a awm tih sawiin, official level-a inbuatsaihnaah chuan inthlang mai thei turin Kolasib District chu a inpeih fel thawkhat tawh tih a sawi a. Inthlan felfai leh muanawm tak buatsaih a nih theih nana inbuatsaihna hrang hrang tar langin, inbuatsaihna pangngai piah lamah mipuiin ṭha taka vote an thlak theihna tura inzirtirna kawngah pawh SVEEP kal tlangin hma lak chhoh reng a ni, a ti a. Chanchinbu mite chu mipuite zirtirna leh inthlan kaihhnawih thu pawimawh puanzar kawngah theih tawp chhuaha thawhpui zel turin a ngen nghal a ni.

He hunah hian 6-Serlui (ST) A/C-a Returning Officer Pu Lalmuan Puia chuan DEO kaihhruaina hnuaiah Kolasib District-ah inthlan felfai leh muanawm tak buatsaih theih ngei a nih a beisei thu a sawi a. Election Officer Pi Christina Lalmuanzuali'n SVEEP hma lakna hrang hrang a tar lang a. Nodal Officer for Postal Ballot Pi F. Lalnisai chuan postal ballot hmanga vote thlak dilna lut zat leh vote thlak dan tur sawi fiahin, Nodal Officer for materials Pu Gilbert Lalhlimpuia'n inthlannaa hman tur form hrang hrang leh bungruate chu peih fel vek tawh a nih thu a sawi.

He hunah hian Tuirial bial ARO Pu Cheemala Siva Gopal Reddy leh Kolasib DIPRO Pu C. Lalhruaitluanga te bakah, District MJA member eng emaw zat telin, zawhna leh chhanna leh sawi hona hun hman a ni bawk.

He huna tar lan a nih danin, election duty turte aṭangin postal ballot-a vote thlak dilna, Tuirial bialah 293, Kolasib bialah 432 leh Serlui bialah 197, a zavaiin dilna 922 a lut tawh a. Polling official-te tan October ni 30 & 31, 2023-ah training-naah vote thlaktir an ni ang a, election duty dangte tan October 31 - November 4 chhungin DC office-ah vote thlakna facilitation centre hawn a ni thung ang. Election-a duty ni lo, essential service-te tana postal ballot-a vote thlak dil theihna hawnah dilna 9 a lut tawh bawk a, hemi hnuaia vote thlak turte tan October 28-ah DC office-ah postal voting centre hawn a ni thung ang. Kum upa, kum 80 chung lam leh vohbik, vote thlak tura polling station pan thei lo, absentee voter aṭangin postal ballot-a vote thlak dilna 142 (senior citizen 123 leh PwD 19) a lut tawh bawk a. In lama vote thlak tur absentee voter-te vote thlaktir turin bial tinah mobile polling team pakhat ṭheuh siam niin, naktuk, October ni 28, 2023 khian a thawh khat nan an in lamah an kal chilh ang a, heta vote thlak remchang lote chu kar leh Thawhṭanni, October ni 30, 2023 khian a thawh hnih nan an tlawh kual leh dawn a ni.

MLA Inthlanpui, 2023 lo awm turah hian Kolasib District-ah polling station 89 awmin, Tuirial bialah polling station 26, Kolasib bialah polling station 29 leh Serlui bialah polling station 34 a awm a. Model polling station, intlar ngaih lohna (queless) polling station atan Kolasib Project Veng P/S chu ruahman niin, Chawngfianga Middle School, Saidan chu Unique Polling Station atan cheibawl mek a ni bawk.

Kumin Inthlanpuiah hian Kolasib District chhunga assembly bial pathumah inthlan chuhtu mi sawmpathum (13), Tuirial bialah 4, Kolasib bialah 4 leh Serlui bialah 5 an awm dawn a. November ni 7, 2023 zing dar 7 leh tlai dar 4 inkar chhungin vote thlak a ni ang a. Ruahman dan chuan electronic voting machine/voter verifiable paper audit trail te chu vote thlak zawh veleh strong room awmna Government Kolasib College-ah luhpuiin, vote chhiar a nih hma chuan sipaite'n an venghim dawn a. Strong room tur hi buatsaih mek niin, peih fel thawkhat tawh a ni.