1798/2023-2024

Aizawl the 8th September, 2023: Vawiin khan Aijal Club-ah Pu Dharmendra Sharma Sr. Deputy Election Commissioner leh Director General, IIIDEM ni bawk chuan MLA General Election 2023 inbuatsaihna atana training hrang hrang pe tura thlan chhuah State Level Master Trainer mi 18 leh District Level Master Trainer mi 33 te kawmna hun a hmang a.

Pu Dharmendra Sharma chuan thu sawiin inthlanpui buatsaih tura peng hrang hranga thawktu turte training pe chhawng ber tura ruat State Level Master Trainer ten training an dawng tha ngei em tih hrechiang tura he hun hi buatsaih a nih thu a sawi a. Master trainer-te chu Election Commission of India-in inthlan buatsaih dan tur ziakna instruction leh lehkhabu hrang hrang, manual leh handbook thar ber a tihchhuahte uluk taka chhiara vawng turin a chah a. Tun hnaia Election Petition hrang hrangte lo chhiar a, chungte chu inzir nan hmang turin a hrilh bawk a ni.

State Level Master Trainer mi 18 te hian India International Institute of Democracy and Election Management (IIIDEM) buatsaih 3-Phase Training Programme paltlang tawhin, Evaluation Test pawh an paltlang vek tawh a. State Level Master Trainer te hian District Level Master Trainer te hnenah training an pe chhawng ang a, anni’n District-ah training an pe ve leh dawn a ni. He inkawm honaah hian thil pawimawh hrang hrang sawi ho niin State Level Master Trainer te hian IIIDEM-in training a kalpui danah rawtna thenkhat an lo thlen bawk a ni.

He inkawm hona hun hi Pu James Lalnunmawia, Jt. Chief Electoral Officer-in kaihruaiin, Pu Madhup Vyas CEO-in inlawmna thu a sawi a, Pu Amol Srivastava, OSD to CEO-in lawmthu sawiin he inkawm hona hun hi khar a ni.