1799/2023-2024

Aizawl the 8th September, 2023 : Vawiin khan School Education Department Directorate Conference Hall-ah International Literacy Day hman a ni a, School Education Department Secretary Dr Lalzirmawia Chhangte-in khuallian niin he hun hi a hmanpui.

Dr Lalzirmawia Chhangte chuan he hunah hian thusawiin India sawrkar chuan UT zawng zawngah leh state thenkhat ziak leh chhiar thiam lo an tlem na Goa, Mizoram leh Sikkim te chu kum 2023-24 chhungin ziak leh chhiar thiam zaa za a puan a tum a ti a. Hemi chungchangah hian August 21,2023 khan virtual mode-a meeting neih a ni a, meeting-ah hian heng UT leh state pathum ten ziak leh chhiar an thiam vekna tur ruahmanna siam a ni a ti bawk.

Secretary chuan Centrally sponsored scheme thar Education for All ( Adult Education tih ?hin), New India Literacy Programme (NILP), chu kum 2022- 2023 atanga 2026-27 chhunga hman turin India sorkarin a pawm a, sum senso tur chu cheng vaibelchhe 1037.90 a ni a, National Education Policy (NEP) 2020 rawtna nena inmilin, he scheme hi kum 15 leh a chung lam ziak leh chhiar thiam lo zawng zawngte tan a ni a ti.

Dr Lalzirmawia Chhangte chuan Literacy hi society hmasawn tehna pawimawh tak a ni a ti a. Mihring nun a ti hausa a, thiamna a neih belh tir a, chu chuan anmahni mai ni loin an chhungkua thlenga chawm thei tur thiamna a neih tir a, lehkha zir san leh zel duhna te a pe a, khawtlang leh ram tana mi chhenfakawm takah a chhuah thin. Ram innghahna lungphum pawimawh tak chu a ram chhunga cheng mihring ten eng ang zirna nge an dawn tih hi a ni a; chutiang a nih avang chuan mipuiten ziak leh chhiar an thiam loh chuan an ram chu a boral mai dawn a ni. Chuvang chuan ram tam takin literacy hi mihring dikna chanvoah an pawm tawh a. Chhuan lo awm zel tur te hma ngaiin literacy hi an ngai pawimawh hle a ni a ti.

Secretary chuan ziak leh chhiar thiam pawimawhna leh hlutna sawiin Literacy chu zirna innghahna lungphum a ni a, mahni inngaihhlutna a siam a, nunphung a tichangtlung a, hriselna a ti?ha a, retheihna umbo nan a ?angkai a ni a ti a. Ziak leh chhiar thiam hian hmeichhia leh mipa inthlauhna a tiziaawm a, democracy hlutna a chawisang a ni a ti bawk.

School Education Department buatsaih International Literacy Day 2023 puala hun hman hi School Education Department-a Addl Director, Pu Lalhmachhuana'n a kaihruai a, kumina International Literacy day thupui chu, 'Khawvel insiamrem meka ziak leh chhiar chawisan nan : Khawtlang nun nghet leh muanawm nghahchhan siam' tih chu hman a ni.

He ni pawimawh hmannaah hian Pu TC Lalremsiama Asst Director Adult Education chuan keynote address a sawi a, Pu R.Lalthlengliana DAEO-in lawmthu a sawi a. School Education Department officer te, SCERT, MBSE leh Samagra Shiksha officer te an kalkhawm a ni.