113/2025-2026

Dated Champhai, 10th April 2026 : Champhai South bialtu MLA leh Mizoram Ex-Service League (MESL) Headquarters, Aizawl President ni bawk Lt. Col. Clement Lalhmingthanga chu vawiin khan Thangtea Hall, Champhai Kahrawt Venga Mizoram Ex-Service League (MESL) Sub-headquarters: Champhai Assembly vawi 19-naah khuallian a ni. He hun hi Honorary Captain C. Rohmingliana, MESL Sub-Headquarters Champhai chuan a kaihruai a, Champhai Bawrhsap Pu Mohammad Aaquib chu khual zahawm a ni.

Khuallian Lt. Col. Clement Lalhmingthanga chuan thu sawiin ex-servicemen hi Mizoram tana mi hlu tak tak an ni tih a sawi a, an chhungte zawng zawng nen ngaihtuah chuan Mizorama vote thlak theiah zaa sawm (10%) an tling a ni tih a sawi. India danpuia a inziah angin sipai nihna reng reng (rank) chu hminga bet reng tura phal sak an ni a, hei hian an hnathawh ropui zia leh hlut zia a tarlang tih a sawi a, Sainik Welfare and Resettlement department pawh ex-servicemen te hamthatna ngawr ngawr ngaihtuah tura ding a ni tih a sawi. Agniveer sipaia luh theihna tura pre-recruitment training thalai te tana buatsaih an tum thu te a sawi a, Territorial Army awm theih nan Tlangsamah hmalakna a kal mek zel a, hmanlai pi pute'n Zawlbuk an neih chhan pawh khua leh tui venghim turin a ni a, chutiang chuan Territorial Army awm tur pawh Champhai mipuite tana thlamuanna tur a ni tih sawiin mel lung pawimawh tak a ni ngei ang tih a sawi. Ex-services mi te hi an hlu a, MESL hian an hlutna an ti lang chhuak zel a ni tih sawiin he inkhawm hun hi hlim taka hmang turin a chah a ni.

He inkhawm hi hun hniha then a ni a, hun khatnaah hian MESL Champhai Secretary Pu Zonunsanga'n report a pe a, member sunna hun chairman-in a kaihruai. Khual zahawm Pu Mohammad Aaquib chuan thu a sawi a, MESL Champhai Vice-President Pu Lalparmawia'n lawmthu sawiin hun a khar. Hun hnihnaah hian infuihtharna leh thusawi hrang hrang ngaihthlak niin intihhlimna hun hman a ni a, MESL Sub-headquarters Champhai hruaitu thar thlanna hun hman a ni bawk.

MESL Sub-headquarters Champhai hi Mizoram Ex-Service Association anga din hmasak a ni a, MESL hnuaia Sub-headquarters nihna hi June 14, 1996 khan an chang a. Tun dinhmunah hian Champhaiah unit 8 an awm mek a ni.