112/2025-2026
Lunglei, 2026 Ṭau thla ni 10 : 2 Mizo Battalion NCC (National Cadet Corps) chuan April ni 6, 2026 aṭang khan 2nd Mizoram Armed Police Complex, Luangmual, Lungleiah NCC cadet-te tan April ni 15, 2026 thleng (ni 10) awh tur Combined Annual Training Camp (CATC-56) an buatsaih.

CATC-56-ah hian Junior Division (JD), Junior Wing (JW), Senior Division (SD) leh Senior Wing (SW) cadet 241 telin, a zatve (50%) dawn lai chu hmeichhia an ni a. Camp Commandant, Colonel Sagar K. Mohanty chuan cadet-te fuihna thu sawiin camp hi a hawng a. 23 Assam Rifles Officiating Commanding Officer, Lt Col. Sahibjit Singh chuan cadet-te hmaah sipai (Armed Force)-a luh dan kawng hrang hrang a sawi a. NCC cadet lo ni tawh ṭhin, Lunglei DIPRO Pu C. Lalhruaitluanga chuan media pawimawhna leh media hman dan ṭha bakah, internet kal tlanga pawi khawihna (cyber crime) laka himna chungchang a zirtir bawk.

CATC-56 hi May thlaa Lungleia buatsaih tur, NCC Grand Fest & Parasailing Camp atana inpuahchana atan hman nghal a ni a. Camp buatsaih chhung, ni sawm chhung hian NCC cadet-te chuan sipai lam (drill), silai leh ralthuam chelek, ram lem (map) en dan, ramhnuaia chettlat dan, infiam leh taksa sawi zawi, hruaitu ṭha ni tura thil pawimawh leh khua leh tuite mawhphurhna hrang hrang an zir dawn a. Mi thiam sawm bikte'n thupui hrang hrang – POCSO Act, kangmei laka himna leh chhiatna thlen thulha chet lak dan, vaihlo leh ruihhlo ṭhat lohzia leh thupui pawimawh tak tak hmangin cadet-te fuihna leh zirtirna hun an hman ṭhin bakah, hnam ziarang pho chhuahna hun te buatsaih a ni bawk ang.