111/2025-2026

Dated Serchhip, the 10th April, 2026 : Vawiin khan Serchhip District Government Land Authority chu an Chairman, District Bawrhsap Pu Paul L. Khuma hovin DCs Meeting Hall-ah an thukhawm a. Meeting-ah hian Thenzawl Peace City (Greenfield Project) hmalakna kal zela sorkar ram hman dan tur leh District chhunga hmasawnna hna hrang hrang thawh dante sawi ho a ni.

Meeting-ah hian Thenzawl Peace City hmalakna hnuaia, Dilpui area-a Animal Husbandry & Veterinary (AH&Vety) Department ram, 140 acre-a zau, ran chaw chinna hmun (fodder plantation) leh hnathawktute hmunhma (residential quarters) te chu, Urban Development & Poverty Alleviation (UD&PA) Department-in hmasawnna hna an thawhna tur atana hman tura ruahman a nih dan chungchangte sawi ho a ni. He hmun hi Neihloh khua-a sawn (relocate) tura rel tawh a nih laiin, AH&Vety Department hotute chuan Neihloh hi khawl hmanga huan leh rante enkawlna (mechanized farming) kalpui na atan chuan hmun remchang nia an hriat loh thu sawiin, thuneitu sang zawkte nen ngaihtuah that leh tura rel a ni.

Serchhip-a Women & Child Development Office sakna tur atana P&E Veng, Soil Department ram (UPC Biak In thlang) chu chiang zawka ennawn (location specific identification) leh ni se tih a ni bawk a. Chutih rualin, Leisang kawia Anganwadi Centre awm mek chu nunau leh naupangte tan a him tawk loh avangin, AOC Veng-a Soil Department ramah sawn tura ruahman a ni bawk.

Bawrhsap Pu Paul L. Khuma chuan sorkar ramte chu ram leh mipui tana vek a nih avangin uluk leh chak zawka humhalhna kalpui nih tur thu a sawi a. Ram ri hung (fencing) leh chhinchhiahna (demarcation) felfai tak neih a tul thu te, sorkar leh vantlang ram nek (encroachment) thinte lakah chak zawka hma lak a nih tur thute sawiin hun hi a khar a ni.