Vawiin khan Lunglei Bazarveng MHIP chuan Bazarveng YMA Hall-ah an din kum 40-na ‘Ruby Jubilee’ lawmna an nei a, Bialtu MLA Pu Chalrosanga Ralte chuan he hun hi a hmanpui.

Ruby Jubilee lawmna inkhawm MHIP Bazarveng President Dr.H.Lalnunmawii kaihhruaiah Khuallian Pu Chalrosanga Ralte chuan Mizote vanneihna chu tlawmngai pawl inhlawm tha leh hnathawk chak, khawtlang tana chawl lova thawk thin kan nei hi a ni a; chung zingah MHIP hi Mizo hmeichhiate chawikawnna leh hmasawnna kawngah nasa takin hma la thin a nih avangin vawiina MHIP Bazarveng kum 40 tlinna lawmnaah a tel thei chu vanneih an ti hle thu a sawi a. Chhungkua leh khawtlang inrelbawlnaah hmeichhiate pawimawhna i hre thar ila, Mizo hmeichhiate chu sorkar hna, sumdawnna kawngah leh politics lamtluangah pawh an duai lo tawh hle a ni, a ti. Hmeichhiaten an pawimawhna hre reng chungin mahni chhungkua leh inchhung theihnghilh thaka kohhran leh khawtlangah an inhman lutuk erawh a that lo thu sawiin Khuallian chuan hmeichhiaten hma an sawn zel rualin an hmeichhiatpui chanhai leh harsa zawkte tanpui leh chhawmdawl hi an tih tur dik tak a ni tiin a fuih bawk. Bazarveng YMA Hall siam puitlin nan MP (LS) Pu CL Ruala hmalaknain Cheng nuai 15 hmuh a nih tawh thu leh Bazarveng ‘MHIP In’ sak mek tanpui nan Cheng nuai 3 a tumsak tur thu a puang a. Pu Chalrosanga hian Bazarveng MHIP dintu la damte hnenah chawimawina a hlan bakah Ruby Jubilee lawmpui nan Cheng 10,000/- a pe bawk a ni.

Vawiin Bazarveng MHIP Ruby Jubilee lawmnaah hian MHIP Group hrang hrang ten Special item, lam leh zai te entirin Bazarveng YMA Zaipawl ten Jubilee lawmpuina hla an remsak bawk a. MHIP Sub-Hqrs Lunglei ten Jubilee lawmpuina Cheng 1000/- an hlan bawk a ni.