Mizoram SSA chuan kum 2016-17 Academic session atan Government leh Government Aided School naupang Class I-VIII te hnenah vawiin khan zirlaibu a thlawnin a sem tan ta a. Zirlaibu sem mekah hian pawl I-V zirlaibu a sem kim thei dawn a. Zirlai nu leh paten an fate tana zirlaibu an leibelh ngai turte chu pawl VI, VII leh VIII tan chauh a ni dawn a ni.

SSA chuan zirlaibu sem tur chungchanga office order 18th March 2016-a a lo siam tawh zirlaibu a thlawna sem kim theih loh tura tarlan tawh class III, IV leh V te tan zirlaibu hi a kimin an pe leh thei dawn tih State Project Office, SSA chuan an sawi a. Central sorkarin zirlaibu leina atana sum a rawn pek bakah state sorkarin state budget atanga lei belhna tur sum mamawh cheng nuai 24 chu a pek dawn avangin zirlaibu sem theih hi a pung ta a ni.

Text book semte hi MHRD-in India ram puma naupang pakhat zel atana a phalsak atanga chhut a ni a. Class I-V tan hian naupang pakhat zelah Rs 150, Class VI-VIII tan naupang pakhat zelah Rs 250 phalsak an ni a. Amaherawhchu, hemi bakah hian Mizoram sorkarin sum a pek belh theih dawn tak avangin Class I-V chin tana zirlaibu sem theih hi a pung dawn ta a ni.